Kaos në pikëkalimin e Merdares

Policia e Kosovës sugjeron të gjithë qytetareve që të shfrytëzojnë pikëkalimet tjera kufitare me qëllim të shmangies së pritjeve të gjata

Në pikën kufitare ndërmjet Kosovës dhe Serbisë në Merdarë janë krijuar kolona të gjata të automjeteve të cilat presin të hyjnë dhe eventualisht të dalin nga Kosova. Sipas një informacioni që ka lëshuar Policia e Kosovës, në territorin e Serbisë rreshtat e kolonave me automjete arrijnë në disa kilometra.

Departamenti i Policisë Kufitare, saktësisht zyrtaret policore të pikëkalimit kufitar Merdare, informojnë se gjate 24 orëve të fundit janë krijuar kolona dhe pritje të gjata si në hyrje për në Republikën e Kosovës ashtu edhe në dalje për në Serbi.

“Pritjet janë duke u bërë me orë të tëra nga të dyja anët, edhe pse nga Kosova për në Serbi, në territorin tonë kolonat janë të gjata diku nga 500-700 metra, mirëpo pritjet janë me orë të tëra, ndërsa në hyrje, sipas qytetarëve kolonat janë me kilometra të gjata”, thuhet në njoftimin e Policisë kosovare.

Në bazë të informacioneve jo zyrtare që ka dhënë Policia e Kosovës, e gjithë kjo pritje bëhet nga neglizhenca dhe mos puna e autoriteteve serbe.