Kapen 12 refugjatë të ngujuar në autofrigorifer

Edhe pse të gjithë ishin të ftohur dhe kishin vuajtur shumë, ata e kishin përballuar relativisht mirë ftohjen dhe pa pasoja të rënda

Policia gjermane gjatë punës në kufirin me Holandën ka hasur të premten në një rast jo të zakonshëm: në një makinë për transport mallrash të ngrira (autofrigorifer) , ajo ka gjetur dymbëdhjetë refugjatë, të cilët i ka liruar duke i shpëtuar nga ngrirja.

Ka qenë vetë shoferi i autofrigoriferit i cili ka alarmuar policinë, pasi që, siç ka deklaruar, kishte dëgjuar trokitje nga pjesa e mbrapme e makinës. Kur policët e kanë hapur derën e autofrigoriferit, në mes të paletave me shishe pijesh kanë gjetur njëmbëdhjetë persona të rritur dhe një fëmijë. Ata ishin refugjatë nga vende si Vjetnami, Kuvajti, Iraku dhe Irani.

Edhe pse të gjithë ishin të ftohur dhe kishin vuajtur shumë, ata e kishin përballuar relativisht mirë ftohjen dhe pa pasoja të rënda, ka thënë një zëdhënës policie.

Ndërkaq, se prej nga kishin hipur në atë makinë dhe në ç`mënyrë, mbetet e paqartë.