Kapet kosovari me dokumente sllovake: Thotë se ka paguar 12.000 euro për to

38-vjeçari i kapur në Gjermani, kishte punuar në Zvicër dhe tani po shkonte në shtëpi, në Kosovë, me një shumë katërshifrore parash...

Natën e së hënës (20 shkurt), policia federale ka transferuar një “sllovak të rremë”. Policët e kapën atë kur pasagjeri i autobusit ishte në rrugë të kthimit në Ballkan nga Zvicra, transmeton albinfo.ch. Me vete kishte rrogën e tij dhe një dokument të falsifikuar.

Pasagjeri i autobusit që udhëtonte nga Gjenova për në Zagreb (Kroaci) u identifikua me një kartë identiteti sllovake dhe një leje qëndrimi zvicerane, thuhet në një komunikatë të Policisë Federale të Gjermanisë, shkruan presseportal.de.

Megjithatë, policia federale e zbuloi kartën e identitetit si falsifikim. I përballur me akuzën e falsifikimit të dokumenteve, i kapuri më në fund pranoi se karta e identitetit ishte e falsifikuar dhe se në fakt ai ishte kosovar.

Siç doli në vazhdim, 38-vjeçari kishte punuar në Zvicër dhe tani po shkonte në shtëpi, në Kosovë, me një shumë katërshifrore parash.

I akuzuari ka deklaruar se e kishte blerë letërnjoftimin fals për 12 mijë euro.

Bashkëshortja, e cila jeton në Kosovë, më vonë përmes telefonit celular i ka dërguar një fotografi të pasaportës së vërtetë kosovare, e cila tregonte të dhëna personale që ndryshonin nga ato të dokumenteve të dorëzuara tashmë, transmeton albinfo.ch. Policia federale arriti në përfundimin se leja zvicerane e qëndrimit ishte lëshuar në bazë të kartës së falsifikuar të identitetit.

“Sllovaku i rremë” tani duhet të përgjigjet për falsifikimin e dokumenteve, vërtetimin indirekt të rremë dhe tentativën për hyrje të paautorizuar në Gjermani, përcjell albinfo.ch. Pas konsultimit me prokurorinë publike të Kempten, të akuzuarit iu desh të depozitonte një depozitë sigurie prej 1200 euro. Policët federalë, në pasditen e djeshme e kanë kthyer kosovarin në Austri, prej nga kishte hyrë në Gjermani.

---