Kelmendi operohet me sukses

Majlinda Kelmeni është operuar me sukses, pas lëndimit që kishte pësuar në Botërorin që u mbajt në Budapest. Pas operimit me sukses, Komiteti Olimpik i Kosovës ka vendosur të dhurojë 4 mijë euro për të mbështetur rehabilitimin e Kelmendit

Lajmin e ka bërë të ditur trajneri Driton Kuka, që ka thënë se tash rikuperimin Kelmendi do ta vazhdojë në Slloveni.

“Për ditëlindjen time sot lajmi i mirë është që ajo që më ka bë krenar ka kaluar operimin me sukses të plotë! Doktor Florini të faleminderit ty nga zemra! Sot Kampionia Olimpike dhe Xhudistja më e mirë e Planetit operoi Ligamentin Kryqëzor me sukses!”, ka shkruar Kuka në Facebook.

Kuka ka vazhduar më tej se rikuperimin do ta vazhdojë te Mitja Bracic i cili e kishte ndihmuar edhe në lëndimin e shkuar.

“Ajo të cilës ju kam frikuar gjatë garave ajo edhe kishte ndodh, Majlinda kishte pësuar lëndim gjatë garës në Budapest! Disponimi i saj pas operimit është i mirë si në foto dhe dhashtë Zoti të tejkaloj sfidën me sukses dhe të rikuperohet sa më shpejt! Rehabilitimin do e vazhdoj në Slloveni tek njeriu që edhe herën e parë e kishte rehabilituar për gara Mitja Bračič. Së bashku drejt Tokios që është caku final i Majlindës!”, ka shtuar më tej ai, përcjell Albinfo.

Në Botërorin e Budapestit, Kelmendi nuk arriti të fitonte as një medalje. Ajo humbi në gjysmëfinale dhe më pas në garën për medaljen e bronztë.

Pas operimit me sukses, Komiteti Olimpik i Kosovës ka vendosur të dhurojë 4 mijë euro për të mbështetur rehabilitimin e Kelmendit.

“Ajo do ta vazhdojë rehabilitimin në Slloveni. Me këtë rast, Bordi Ekzekutiv i Komitetit Olimpik të Kosovës ka marrë vendim që për rehabilitimin e Majlinda Kelmendit ta mbështetë me 4 mijë Euro”, thuhet në njoftim.

KOK-u ka kujtuar edhe ndihmën dhënë Alvin Karaqit, karateistit të cilit i ishin dhuruar 3 mijë euro për heqjen e pjesshme të shpenzimeve të operimit, pas lëndimit të pësuar në garën ndërkombëtare në Erzurum të Turqisë.

“Kujtojmë që kjo mbështetje vlen vetëm për sportistët elitarë”, thuhet në fund të njoftimit.