Kërkesa e Kosovës për vendet mike: Dënoni krimet serbe

epa04141615 Kosovo Albanians mourn during the reburial ceremony of 19 of 46 Albanians killed by Serb Security forces during the 1998-99 war, in the village of Krusha e Vogel, Kosovo, 26 March 2014. Remains of 46 victims from a mass grave were identified and reburied 15 years after they were killed during the war. EPA/VALDRIN XHEMAJ

Kosova kërkon nga shtetet mike që të dënojnë krimet serbe të kryera në Kosovë.

Të gjitha parlamentet e shteteve mike së shpejti do ta kenë një letër si kërkesë nga kryetari i Kuvendit, Kadri Veseli.

Atyre do t’u kërkohet që ta miratojnë nga një rezolutë, përmes së cilës do t’i dënojnë krimet serbe të kryera 20 vjet më parë në Kosovë, raporton KTV, përcjell Albinfo.ch.

Në një deklarim për KTV-në, kreu i Kuvendit është shfaqur i sigurt se këtë mbështetje do ta ketë sepse, sipas tij, historia e dhimbshme e Kosovës është e pamohueshme.

Ai sërish insiston për tribunalin ndërkombëtar për krimet serbe, derisa ata që këto iniciativa i quajnë të vonshme, i konsideron të mjerë e të papjekur.

Edhe kryeministri i Kosovës, Ramush Haradinaj, ka thënë se e vërteta e Kosovës nuk mund të mohohet, e këtu ka kërkuar të ketë unitet.

Ditë më parë, Kuvendi i Kosovës e ka mandatuar një komision të përkohshëm, i cili do ta hartojë një rezolutë përmes së cilës do t’i kërkojë Serbisë që ta pranojë se ka kryer gjenocid, krime kundër njerëzimit dhe krime lufte në Kosovë, gjatë regjimit të Sllobodan Millosheviqit.