Kërkesat e kosovarëve për azil në Zvicër thuajse janë zhdukur

Në një intervistë për të përditshmen zvicerane «24Heures», shefi i Zyrës federale të migrimeve, Mario Gattiker, e shpjegon rënien e numrit të kërkuesve të azilit kosovarë me ndërprerjen e ndihmave financiare

Numri i kërkuesve të azilit në Zvicër do të arrijë rreth 24.000 persona për këtë fundvit. Kërkuesit e azilit vijnë kryesisht nga Eritreja si dhe Siria. 

Tri pyetje për Mario Gattiker, Sekretar i Shtetit si dhe shef i Zyrës federale të migrimeve të Zvicrës.

Përkundër Gjermanisë,  Zvicra thuajse nuk ka më kërkesa azili me prejardhje nga Kosova. Për çfarë arsyesh?

Për të gjitha vendet e Ballkanit, ne kemi adoptuar një procedurë të përshpejtuar të 48 orëve. Ne i kemi ndërprerë të gjitha ndihmat financiare si dhe të ndihmave për kthim dhe  kemi marrë masa në vendin e tyre të prejardhjes. Respektivisht të informimit në vend mbi situatën juridike të azilit në Zvicër. Këto kanë shkaktuar efekte shumë pozitive dhe kanë ndiktuar në rënien e kërkesave të azilit. 

Përse mendoni se kërkesat e azilit kanë për t’u rritur dhe se do ta mbërrijnë shifrën e 229’000 kërkuesve për vitin 2015 ?

Presioni migrues do të rritet, ngase jemi para një situate dramatike në Lindjen e Mesme, veçanërisht në Siri dhe në Irak. Po ashtu edhe situata në Libi është shumë konfliktuoze dhe ku gjenden me qindra mijëra refugjatë. Ne nisemi nga parimi se rruga e azilit, e cila kalon përmes detit Mesdhe do të vazhdojë të shfrytëzohet edhe më shumë. Kjo ka pra efekt direkt në kërkesat e azilit në Zvicër.

Një pjesë e madhe e kërkuesve të azilit vijnë nga Eritreja. Mirëpo, disa medie flasin për refugjatë eritrejanë që kthehen pa telashe në vendin e tyre. Si paraqitet kjo çështje ?

Ne kuptohet shikojmë nëse ka abuzime, sikurse për shembull, kthimi i një refugjati në vendin e tij të prejardhjes për t’i kaluar pushimet. Nëse ne konstatojmë ndonjë abuzim, kjo pason me rihapjen e procedurës së azilit për të.