Kërkohen kushte më të lehta për viza humanitare

Keystone

Ministrja e Drejtësisë, Elisabeth Baume-Schneider, po kërkon që të bëhen më fleksibël kushtet për dhënien e vizave humanitare.

Sipas saj, nevoja për të pasur një lidhje me Zvicrën është pa dyshim një pengesë shumë e madhe, shkruan swissinfo.

Megjithatë, Baume-Schneider tha se ajo së pari do të duhet të diskutojë çështjen me qeverinë dhe të shqyrtojë në terma të përgjithshëm se çfarë është ligjërisht dhe politikisht e realizueshme.

“Ndoshta ne mund të lëvizim paksa kufijtë e asaj që është e mundur”, i tha ajo radios publike zvicerane, SRF, të shtunën, përcjell albinfo.ch.

Vizat humanitare lejojnë personat e kërcënuar të hyjnë legalisht në Zvicër për të kërkuar azil.

Sipas Sekretariatit Shtetëror për Migracionin (SEM), kushtet janë që jeta ose integriteti fizik i aplikantit të jetë nën kërcënim të drejtpërdrejtë, serioz dhe konkret. Personi në fjalë gjithashtu duhet të ketë një lidhje të ngushtë dhe aktuale me Zvicrën dhe të ketë perspektivë integrimi, shkruan swissinfo.

Baume-Schneider priste një rritje të kërkesave për azil drejt vjeshtës, veçanërisht nga Afganistani. Për t’u marrë me këtë, ajo shpreson të jetë në gjendje të arrijë një kompromis për të krijuar 1,500 vende pritjeje, pas refuzimit të Senatit të një kredie financimi për të krijuar 3,000 vende në kontejnerë.

Ministrja i Drejtësisë shtoi se përpjekjet në drejtim të integrimit dhe trajnimit do të duhet të rriten për të parandaluar problemet. Një koncept për këtë qëllim do të hartohet vitin e ardhshëm, përcjell albinfo.ch.