Kërkohet ndërtimi i një sinagoge në Prishtinë

Për çdo festë, hebrenjtë kosovarë duhet ta gjejnë sinagogën më të afërt në rajon, prandaj ata kërkuar nga autoritetet e Prishtinës, që të lejohet ndërtimi i një sinagoge në kryeqytet   

Edhe pse janë komunitet shumë i vogël, hebrenjtë që jetojnë në Kosovë po kërkojnë që të ndërtohet një sinagogë për lutjet e tyre. Për çdo festë hebrenjtë kosovarë duhet ta gjejnë sinagogën më të afërt në rajon, prandaj ata kanë kërkuar nga autoritetet e Prishtinës, që të lejohet ndërtimi i një sinagoge në kryeqytet.

Madje, hebrenjtë i kanë bërë edhe një propozim pushtetit lokal se ku mund të ndërtohet ky objekt fetar.

Ruzhdi Shkodra, hebre kosovar, thotë se dekada më parë, kryeqyteti ka pasur tri Sinagoga, prandaj është e nevojshme që edhe Prishtina si kryeqendrat e tjera të rajonit ta ketë këtë objekt. E rëndësia e saj, nuk është vetëm fetare, konsideron ai.

Kërkesë për ndërtimin e një objekti fetar në komunën e Prishtinës ka bërë edhe komuniteti i protestantëve. Veçse ata nuk kërkojnë qe kisha qendrore e tyre domosdo te ndërtohet ne qendër të qytetit, por ku do diku në kryeqendër. Për protestantët janë me rëndësi disa tipare të tjera, raporton KlanK.

Për këto dy  kërkesa vetë kryetari i Komunës së Prishtinës, Shpend Ahmeti, ditë më parë i njoftoi edhe përfaqësuesit e feve të tjera. Por, zyrtarja për medie e komunës së Prishtinsë, Miranda Mullafazliu pohoi se ende nuk ka asgjë konkrete rreth kësaj çështjeje, pasi propozimet janë në fazën e bisedimeve mes komuniteteve fetare dhe drejtorisë së urbanizmit për vendosjen e lokacioneve.