Kërkohet zgjidhje e shpejtë për krizën energjetike

Kryeministri mbledh në takim drejtuesit e institucioneve përgjegjëse

Kriza energjetike, e cila mund ta kaplojë vendin tonë ka bërë që institucionet të alarmohen. Për mundësinë e tejkalimit të kësaj situate, kryeministri në detyrë, Isa Mustafa, mblodhi në një takim pune ministrin e Mjedisit, Ferat Shala, atë të Zhvillimit Ekonomik, Blerand Stavileci dhe drejtorin menaxhues të KEK-ut, Arben Gjukaj, transmeton albinfo.ch.

Në njoftimin për media të qeverisë theksohet se bartësit e këtyre institucioneve u zotuan se do të përshpejtojnë të gjitha veprimet në fushëveprim të tyre për të adresuar dhe zgjidhur sa më shpejt të gjitha problemet, në mënyrë që pengesat pronësore dhe të ndërtimeve pa leje në terren, të mos vënë në rrezik prodhimin e energjisë elektrike.

“Pritet që qytetarët, të cilat kanë prona në atë pjesë, të bashkëpunojnë me KEK-un dhe institucionet shtetërore, për të hapur rrugë që vendi të mos vihet në rrezik rreth energjisë elektrike”, theksohet në njoftim. Kjo çështje do të diskutohet edhe në mbledhjen e nesërme të ekzekutivit.