KFOR-i shton 700 trupa në Kosovë

© 2023 ALBINFO.CH

Sekretari i përgjithshëm i NATO-s, Jens Stoltenberg, ka njoftuar se në Kosovë do të dislokohen 700 trupa nga Forca Rezervë Operacionale për Ballkanin Perëndimor.

Ai po ashtu bëri të ditur se në gatishmëri të lartë do të vendoset edhe një batalioj shtesë, shkruan Koha.net.

“Ne do të vazhdojmë të veprojmë sipas mandatit që buron nga OKB-ja. Ne kemi vendosur të dislokojmë 700 trupa shtesë nga Forca Operacionale Rezervë për Ballkanin Perëndimor. Po ashtu kemi vendosur në gatishmëri një batalion shtesë, që të zhvendoset nëse duhet. Këto janë hapa për të garantuar se KFOR-i ka forcën dhe aftësinë për të vepruar sipas mandatit që e ka. Dhuna kthen Kosovën prapa e po ashtu të gjithë rajonin. I vendos në rrezik aspiratat euroatlantike. Prishtina dhe Beogradi duhet të marrin hapa konkret për t’i ulur tensionet. Të frenohen nga veprimet e papërgjegjshme e të angazhohen në dialogun e lehtësuar nga BE-ja, që është rruga e vetme”, ka thënë Stoltenberg, përcjellë albinfo.ch.

Stoltenberg ka dënuar sulmin ndaj ushtarëve të KFOR-it në Zveçan të hënën, ku u lënduan 30 ushtarë.“Ne e dënojmë sulmin e paprovokuar. Është e papranueshme dhe duhet të ndalet”, u shpreh ai.