Kina tërhiqet nga lufta tregtare me Shtetet e Bashkuara

Nga lufta tregtare në mes të dy vendeve më të forta ekonomikisht është larguar Kina.

Shteti aziatik duket se ka lëshuar pe nga lufta tregtare me Shtetet e Bashkuara, duke njoftuar se ajo ka hequr disa tarifa të vendosura mbi mallrat amerikane.

Vendimi duhet të hyjë në fuqi sot.

Tarifat e hequra prekin misrin, grurin dhe disa pjesë të automjeteve. Të tjerat, për momentin do të vazhdojnë ashtu siç janë, kanë deklaruar nga Ministria e Financave të Kinës, shkruan telegrafi, përcjell albinfo.ch.

“Kina shpreson në bazat e barazisë dhe respektit reciprok, të bashkëpunojë me SHBA-në për të zgjidhur problemet dhe të promovohen zhvillimet e qëndrueshme të ekonomisë së të dyja vendeve”, thuhet në njoftim.

Tarifat e reja amerikane për importet kineze duhet të hynin në fuqi të dielën.

Por, kjo masë është anuluar tani për tani.

“Ne do t’i fillojmë negociatat për marrëveshjen në fazën e dytë menjëherë, në vend se të presim deri pas zgjedhjeve të vitit 2020”, tha presidenti amerikan, Donald Trump. “Kjo është një marrëveshje e madhe për të gjithë”, shtoi ai.

Nëse tarifat e reja do të kishin hyrë në fuqi, atëherë mallrat e prodhuara nga Kina, siç janë: telefonat, rrobat dhe lodrat, do të ishin bërë më të shtrenjta për amerikanët pikërisht përpara festës së Krishtlindjeve.

---