Klubi i çiklistëve Shqiponjat në Zvicër mbështet “Cycle Kosovo for Children”

Edhe këtë vit diaspora merr pjesë në “Cycle Kosovo for Children” që ka për qëllim mbledhjen e mjeteve financiare për spitalet e fëmijëve në Kosovë. Klubi i çiklistëve shqiptarë në Zvicër Shqiponjat – Cycling Club Eagles do të jetë një prej mbështetësve kryesorë të eventit, ku për katër ditë synohet të përshkohen 500 km duke ngarë biçikletën nëpër qytetet e Kosovës dhe 6,000 metra ngjitje me biçikletë.

Për klubin Shqiponjat kjo është mundësi e mirë e eksplorimit të bukurive natyrore të Kosovës, edhe pse këtë e kanë bërë edhe herë të tjera. Dy çiklistët dhe themeluesit e këtij klubi, Refik Ramadani nga Ferizaj dhe Suat Iseni nga Gostivari, në qershor të vitit 2022 ishin pjesëmarrës në eventin Cycle “Kosovo for Children”, ku për 4 ditë rresht përshkuan 500 km rreth Kosovës me 6000 metra ngjitje dhe të gjitha fondet që mblidhen janë të destinuara për spitalet e fëmijëve në Kosovë, anëtarët e kanë cilësuar si një nga eksperiencat më të paharruara. “Pas mikpritjes fantastike dhe asaj përvoje të paharruar, unë, kryetari i tanishëm i klubit, e shoh të arsyeshme që ne si klub edhe këtë vit të jemi mbështetës kryesor të eventit të këtij viti, ku do të mbledhim dhe sponzor”, ka deklaruar kryetari.

Karakteristikë e klubit është përbërja e anëtarësisë, ku janë mbledhur shqiptarë nga të gjitha trojet si Kosova, Maqedonia e Veriut e Lugina e Preshevës, por që klubi po rritet e interesi është i lartë.

Si klub organizojnë aktivitete e turne të shpeshta sidomos për manifestime. Anëtarët e klubit kanë qenë pjesëmarrës edhe në maratona. Në garën 150 km në tri shtete; Gjermani, Zvicër e Austri, çiklistët Senad Mamudi, Suat Iseni dhe Bujo Ahmeti morën edhe medaljen e argjendtë.

Çiklisti i klubit Sedat Adili bëri udhëtimin me biçikletë gjatë verës së vitit 2020 prej Zürich deri në Gostivar, ai përshkoi rrugën përreth detit Adriatik deri në Tiranë e më pas në Kosovë dhe duke i kaluar 2562 kilometra për 15 ditë. Çiklisti tjetër i klubit Sami Imeri theu rekordin, për katër ditë e 20 orë udhëtoi me biçikletë nga Chiasso e deri tek kufiri në Dheun e Bardhë duke kaluar 1480 km. Gjithashtu anëtari dhe poeti Vaxhid Xhelili, me prejardhje nga Bujanoci udhëtoi nga Baseli në fshatin e tij të lindjes, Lluçan në Buajnoc. Vitin e kaluar çiklisti dhe anëtari i klubit Dashmir Hamiti arriti që udhëtimin e tij prej Cyrihut deri në vendlindjen e tij në Vrapçisht të Gostivarit ta realizojë për 15 ditë.

Cycling Club Eagles është klubi i parë dhe ndoshta i vetëm i çiklistëve shqiptarë që jetojnë në Zvicër. Klubi u themelua në vitin 2020, duke marrë parasysh fluksin e madh të ngasjes së biçikletës në kohën e pandemisë e karantinimit nga COVID – 19 në Zvicër. Një grup prej pesë çiklistësh (Refik Ramadani, Blerim Sallmani, Bujo Ahmeti, Suat Iseni dhe Senad Mamudi) e panë të arsyeshme themelimin e klubit të çiklistëve shqiptarë për të rritur aktivitetet në gjithë shtetin zviceran. Përgjatë vitit 2020 ata vizituan rreth 27 prej liqeneve më të bukura të Zvicrës.

Që nga koha e themelimit klubit i janë bashkuar shumë çiklistë dhe numri ka shkuar në 21 anëtarë të rregullt.

---