Komunat e Dukagjinit “krahëhapur” për bashkatdhetarët

Ministri i Diasporës, Valon Murati ri përsëriti qëndrimin se bashkatdhetarët duhet të priten në mënyrën më të mirë të mundshme nga komunat kosovare

Ministri i Diasporës, Valon Murati mori mbështetje të plotë nga tre kryetarët e komunave të Rrafshit të Dukagjinit, Gazmend Muhaxheri, kryetar i Pejës, Mimoza Kusari – Lila, kryetare e Gjakovës dhe Rasim Selmanaj, kryetar i Deçanit, për pritjen sa më të mirë të bashkatdhetarëve gjatë verës.

Të tre kryetarët e komunave u zotuan se do të bëjnë përgatitjet më të mira të nevojshme për pritjen e bashkatdhetarëve duke koordinuar kalendarin e aktiviteteve edhe me Ministrinë e Diasporës.

Ministri Murati, ndërkaq i njoftoi ata për aktivitetet e planifikuara të Ministrisë, ndërsa ri përsëriti qëndrimin që bashkatdhetarët duhet të priten në mënyrën më të mirë të mundshme. Po ashtu, ai prezantoi edhe memorandumin e bashkëpunimit, ndërsa së bashku u dakorduan që të kenë edhe një kalendar të përbashkët të aktiviteteve gjatë muajve kur bashkatdhetarët tanë vizitojnë atdheun.

Gjatë këtyre takimeve po ashtu u diskutuan edhe çështje të tjera si hartimi i regjistrit të diasporës dhe mërgatës, mundësitë për investime nga diaspora dhe një varg çështjesh të tjera të cilat kanë të bëjnë me zhvillimin socio – ekonomik, thuhëhet në njoftimin e MeD-it, raporton Albinfo.Ch.