Konflikti në Ukrainë, sfida kryesore e OSBE-së

Kryeministri i Shqipërisë, Edi Rama, informoi të enjten, më 6 shkurt, Këshillin e Sigurimit të OKB-së për punën që Shqipëria do të bëjë gjatë kryesimit të OSBE-së, Organizatës për Siguri e Bashkëpunim në Europë, gjatë vitit 2020.

Mbështetja e Shqipërisë

Ambasadori gjerman në OKB, Christian Heusgen, nuk e fsheh mbështetjen që i jep kryeministrit shqiptar. Që në fjalët e para ai prezanton kryeministrin shqiptar, që është artist, luan basketboll dhe drejton OSBE-në. Gjermania është një nga vendet që e ka krijuar OSBE-në dhe e mbështet shumë punën e organizatës si financiarisht, ashtu edhe me personel. “Gjermania mbështet partneritetin midis OSBE-së dhe OKB-së”, thotë ambasadori gjerman. Ai thekson ndër detyrat, rritjen e rolit të gruas, luftimin e dhunës kundër grave dhe trajtimin e dhunës seksuale. Duke folur për Ukrainën, ai kërkon që të zbatohen premtimet e marra në samitin e Parisit, duke i bërë thirrje për këtë Moskës.

Ambasadori i Vietnamit, Dang Dinh Quy, mbështeti prioritetet që ka vendosur Shqipëria në kryesimin e OSBE-së, duke nënvizuar të rëndësishëm rritjen e rolit të gruas në proceset e paqes.

Përfaqësuesja e Sant Vincent dhe Grenadineve në OKB, e vuri theksin në ndryshimin e klimës dhe rritjen e pasigurisë si shkaqe të konflikteve. Ajo kërkoi që duke qenë organizatë multilaterale, OSBE të promovojë bashkëpunimin ndërkufitar për mbrojtjen e ambientit dhe zbutjen e ndryshimeve të klimës.

Përfaqësuesi i Tunizisë i vuri theksin konflikteve në rajonin e Mesdheut, për të cilat kërkoi aspekte të reja trajtimi. Terrorizmi, ekstremizmi i dhunshëm, siguria në fushën e ambientit dhe siguria në internet, kërkojnë rritjen e bashkëpunimit midis OSBE-së dhe parnterëve të tjerë në Afrikë për rritjen e stabilitetit në rajonin e Mesdheut.

Ambasadori francez pranë OKB-së, Nicolas de Rivière, premtoi mbështetjen e Francës për Shqipërinë për arritjen e synimeve që i ka vënë vetes në kryesimin e OSBE-së. Ai quajti prioritet kryesor Ukrainën Lindore dhe vlerësoi rolin që OSBE luan si organizatë multilaterale.

USA, New York: UN- Karen Pierce- Großbritannien (picture-alliance/AA/A. Ozdil)
Karen Pierce, ambasadorja e Mbretërisë së Bashkuar në OKB

Ukraina prioritet

Ambasadorja e Mbretërisë së Bashkuar Karen Pierce, e quajti po ashtu konfliktin në Ukrainë si një nga prioritete kryesore, ku OSBE luan rol të rëndësishëm në bazë. Ambasadorja shprehu mbështetje për mision monitorimi në Ukrainën Lindore, i cili duhet të ketë akses të plotë. Ajo i bëri thirrje Moskës të lirojë 89 të burgosurit politikë që ka dërguar në Moskë dhe Krime. Ambasadorja Pierce kërkoi që Rusia të respektojë integritetin territorial të Ukrainës.”Krimea dhe Donbas janë pjesë e Ukrainës”, tha ambasadorja e Mbretërisë së Bashkuar. Ajo siguroi mbështetjen e vendit të saj për punën që Shqipëria do të bëjë në OSBE.

Ambasadori i Estonisë, Sven Jürgenson, kërkon bashkëpunim të ngushtë midis OSBE dhe OKB. Ai dënoi aneksimin illegal të Krimesë dhe Sevastopolit dhe agresionin ushtarak mbi Ukrainën Lindore. Ambasadori i bëri thirrje Rusisë të respektojë marrëveshjen e Minskut. Formula për vendosjen e sigurisë në rajon është heqja e okupimit dhe kthimi efektiv i territoreve. Ai pyet kryeministron Rama se si mund të ndihmojë OSBE dhe Këshilli i Sigurimit në praktikë për të gjetur zgjidhjen e konfliktit?

Rusia kërkon rol neutral

Përfaqësuesi i Rusisë, zëvendësambasadori Dmitry Polyanskiy, thotë se shpreson që Shqipëria të mbajë rol neutral në arritjen e konsensuseve dhe promovimin e interesave kolektive të vendeve anëtare të organizatës. Polyanskiy thotë se ka ardhur koha që OSBE të përmirësojë kualitetin e luftës kundër drogës. Ai premtoi se do të mbështesë të gjitha përpjekjet e OSBE-së për zgjidhjen e konflikteve në Nagroni Karabak dhe Transilvani. Ai kërkoi zbatimin e marrëveshjes së Minskut dhe vazhdimin e dialogut në Grupine Kontaktit. „Me gjithë përpjekjet diplomatike, zgjidhja e krizës në Ukrainë ka rrugë të gjatë përpara“, tha Polyanskiy.

Michael Barkin, këshilltar politik në Ambasadën e SHBA-së në OKB, tha se duke qenë mbështetësi më i madh i OSBE-së, Amerika është duke nxitur përpara punën e OSBE-së në të gjitha dimensioned.  Ai e quajti konfliktin në Ukrainë kërcënimin më të madh për sigurinë në Europë që me përfundimin e Luftës së Ftohtë. Mbasi përshëndeti këmbimin e të burgosurve, ai kërkoi që Rusia të bëjë më shumë për të vendosur armëpushimin dhe për të respektuar sovranitetin e Ukrainës në Ukrainën Lindore dhe në Krime.

---