Kontrolle në kufijtë e BE-së, edhe për evropianët

Së shpejti do të aplikohen kontrolle më të rrepta në kufijtë e Bashkimit Evropian edhe për qytetarët e BE-së. Parlamenti dhe Këshilli Evropian kanë arritur të hënën një marrëveshje mbi propozimin e Komisionit Evropian, përcjell albinfo.ch.

Qytetarët e vendeve të treta u nënshtrohen gjithnjë kontrolleve të dokumenteve dhe kontrolleve të sigurisë që konsistojnë në kryqëzimin e të dhënave të tyre me ato të bankave të të dhënave më të rëndësishme, në hyrje të BE-së. Por, reforma e Kodit të Kufijve Schengen (Schengen Borders Code) fut kontrollet e detyrueshme edhe për shtetasit evropianë me sistemin informativ Schengen (SIS- Schengen Information System) dhe me bankën e të dhënave Interpol të dokumenteve të vjedhura apo të humbura (Stolen and Lost Travel Documents Database, SLTD).

Vendet anëtare do të kenë edhe mundësinë të bëjnë kontrolle sistematike të qytetarëve të BE-së me sisteme të tjera nacionale dhe të dhënash të tjera të Interpolit. Madje, qytetarët e vendeve joevropiane do të kontrollohen edhe kur dalin nga BE-ja, në SIS dhe SLTD. Kjo, shpjegon Komisioni Evropian, duhet të bëhet në respekt të plotë të rregullave për mbrojtjen e të dhënave personale dhe të legjislacionit evropian mbi të drejtat themelore.

Tani marrëveshja duhet të miratohet formalisht nga bashkëligjvënësit, që të hyjë në fuqi dhe të zbatohet sa më shpejt të jetë e mundur nga shtetet anëtare.