Kori i Filharmonisë debuton në Gjermani me program ndërkulturor

Nga Prishtina në Hamburg e Düsseldorf: debutimi i Korit të Filharmonisë

Kori i Filharmonisë së Kosovës do të debutojë në Gjermani më 8 dhe 9 shtator, me koncerte në Kishën e Shën Pjetrit në Hamburg dhe në Kishën e Shën Gertrudit në Düsseldorf. Nën dirigjimin e Hajrullah Sylës, kori do të interpretojë një program të larmishëm që sjell bashkë muzikën korale shqiptare dhe atë evropiane, me vepra nga kompozitorët kosovarë Halit Kasapolli, Rafet Rudi, Mendi Mengjiqi e Baki Jashari, si dhe autorë botërorë si Johannes Brahms e Ēriks Ešenvalds, përcjell albinfo.ch.

Ushtruesi i detyrës së drejtorit të Filharmonisë, Dardan Selimaj, theksoi se ky është një program ambicioz që shënon edhe 25-vjetorin e institucionit. Ndërsa dirigjenti Syla tha se paraqitja para publikut gjerman është një mundësi e rëndësishme për të treguar se Kosova ka një skenë muzikore që mund të krahasohet me atë evropiane.

Pas këtyre koncerteve, Filharmonia do të vazhdojë sezonin e ri në Prishtinë dhe Shkup, ku më 26 shtator do të hapë sezonin me premierën e oratoriumit “Nëna Terezë” nga Mendi Mengjiqi.

---