Covid-19 në Zvicër, sërish në “binarë normalë”: 17 të infektuar, asnjë i vdekur

17 infeksione të reja dhe asnjë viktimë, brenda 24 orëve të fundit, ka raportuar sot (BAG) për Zvicrën dhe Lihtenshtajnin

Pas një ngritjeje të befasishme që u shënua dje, me 32 të infektuar, sot, e shtunë, numri ka rënë sërish në “binarët” me të cilët jemi mësuar. 17 infeksione të reja brenda 24 orëve të fundit, ka raportuar sot Zyra Federale e Shëndetit Publik (BAG) për Zvicrën dhe Lihtenshtajnin.

Dy ditë më parë kanë qenë 15 dhe ngjashëm edhe në ditët e tjera, para saj, shkruan albinfo.ch.

Lajmi i djeshëm ishte më shqetësues edhe për faktin se të njëjtën ditë u njoftua edhe për rastin e parë të dyshuar në Zvicër për vdekjen e një fëmije nga koronavirusi. Më vonë u bë e ditur se bëhej fjalë për një foshnjë, e cila infeksionin e kishte marrë në Maqedoni, transmeton albinfo.ch. Ende nuk dihet me siguri nëse shkaktari i drejtpërdrejtë i vdekjes së foshnjës ishte sëmundja Covid-19, por dihet se ajo ka qenë e infektuar edhe nga kjo, duke pasur krahas kësaj edhe sëmundje tjera.

Sipas BAG  deri më sot janë 1657 viktima te konfirmuara nga koronavirusi. Ky numër ishte regjistruar dje, kur ishin raportuar 6 vdekje të reja. Ndërsa sipas worldometers.info, numri i viktimave nga covid-19 në Zvicër ka arritur në 1919, por asnjë vdekje e re nuk ka ndodhur në 24 orët e fundit.

---