Kosova dhe Shqipëria kanë bërë progres kundër korrupsionit

Të gjitha vendet e Ballkanit Perëndimor ndërkaq kanë rënë për disa pozita në krahasim me një vit më parë, ndërkohë që Maqedonia ka shënuar rënien më të madhe nga vendet e tjera

Në raportin e “Transparency International”, sa i përket indeksit të perceptimit të korrupsionit, Kosova dhe Shqipëria kanë bërë progres, duke qenë edhe te vetmet shtete të Ballkanit Perëndimor që kanë përparuar, raporton albinfo.ch.

Në bazë të raportit për vitin 2016, Kosova radhitet e 95-ta në një nivel me Argjentinën, Sri Lankën, El Salvadorin, Maldivet dhe Beninin. Kosova ka marrë 36 pikë nga 100 të mundshme, duke bërë përparim në krahasim me një vit më parë kur është radhitur në vendin e 103-të me 33 pikë gjithsej.

Shqipëria për vitin e dytë me radhë, ndërkaq, ka shënuar përparim në radhitjen e TI-së, duke zënë vendin e 83-të me 39 pikë duke u zhvendosur nga vendi i 88-të ku radhitej një vit më parë.

Në tri vjet Shqipëria e ka përmirësuar me 33 vende renditjen e saj në indeksin e perceptimit të korrupsionit nga “Transparency International”. Ky është vlerësimi më pozitiv për Shqipërinë në 17 vjet, që nga viti 1999 kur vendi u bë pjesë e analizës së këtij raporti.

Të gjitha vendet e Ballkanit Perëndimor ndërkaq kanë rënë për disa pozita në krahasim me një vit më parë, ndërkohë që Maqedonia ka shënuar rënien më të madhe nga vendet e tjera.

Serbia është radhitur e 72-ta, Mali i Zi i 64-ti, Bosnja e Hercegovina e 83-ta që në krahasim me një vit më parë ka rënë nga pozita e 76-të.

Maqedonia është radhitur e 90-ta me 37 pikë gjithsej, duke shënuar rënien më të madhe nga të gjitha vendet e rajonit, meqë një vit më parë qëndronte në vendin e 66-të.