Kosova do të luajë pa kapitenin Rrahmani ndaj Sllovenisë dhe Suedisë

Përfaqësuesja e Kosovës në futboll do të paraqitet pa kapitenin Amir Rrahmani në duelet kundër Sllovenisë dhe Suedisë. Lajmi vjen pas një lëndimi që Rrahmani pësoi gjatë stërvitjes të shtunën, dhe pritet që ai të rikthehet në fushë pas ndeshjeve të muajit të ardhshëm, sipas raportimeve të mediave italiane të dielën.

Trajneri Antonio Conte kishte konfirmuar mungesën e Rrahmanit për ndeshjen kundër Milanit, por pa dhënë më shumë detaje. Të dielën, disa burime italiane raportuan se mbrojtësi do të mungojë edhe në ndeshjet e Kosovës në tetor, që bëjnë pjesë në kualifikimet për Kupën e Botës 2026, përcell albinfo.ch.

Sipas “Corriere del Mezzogiorno”, Rrahmani gjithashtu do të humbasë takimet kundër Sporting Lisbonës dhe Genoas, dhe pritet të rikthehet pas përfundimit të ndeshjeve të tetorit.

Mbrojtësi nuk ishte pjesë e fitores së Kosovës ndaj Suedisë dhe i mungoi Napolit në sfidat kundër Fiorentinës dhe Manchester Cityt. Ai u lëndua në humbjen 4:0 të Kosovës nga Zvicra më 5 shtator.

Kosova do të presë Slloveninë më 10 tetor dhe më pas do të luajë në Goteborg kundër Suedisë pas tre ditësh.