Kosova e Maqedonia, me marrëveshje në fushën e kinematografisë

Kosova dhe Maqedonia kanë nënshkruar marrëveshjen e bashkëprodhimit në fushën e kinematografisë në Festivalin e Cannes.

Kjo marrëveshje do të ndihmojë në zhvillimin e prodhimit të filmit dhe do të inkurajojë zhvillimin e mëtejshëm të lidhjeve kulturore dhe teknologjike mes dy vendeve, përcjell albinfo.ch.

Drejtori i Agjencisë së Filmit të Maqedonisë tha se të dyja vendet kanë bashkëpunim shumë të mirë në këtë fushë, ndërsa marrëveshja është e rëndësishme për të ardhmen e filmbërësve.

“Ky është një moment shumë i veçantë, sepse nënshkruhet marrëveshja e parë e këtij lloji dhe pikërisht me shtetin fqinj, me të cilin kemi një histori të shkëlqyeshme të bashkëprodhimit”, u shpreh drejtori i QKK-së, Arben Zharku. Marrëveshjen e ka përshëndetur edhe ministri i Kulturës, Kujtim Gashi, i cili tha se kinematografia e vendit tonë është shembull i suksesit. Maqedonia është një ndër mbështetësit më të mëdhenj të kinematografisë kosovare, vetëm brenda vitit të fundit katër projekte kanë gjetur mbështetje nga ky shtet.