Kosova ka kaluar shifrën prej 1.5 milion banorëve

Përfundon procesi i regjistrimit të popullsisë

Sot në Kosovë përfundoi regjistrimi i popullsisë edhe për komunat të cilat kishin kërkuar shtyrjen e afatit për një javë në mënyrë që të përmbyllin suksesshëm këtë proces.

Për procesin e regjistrimit në Edicionin Special të Klan Kosovës, në një video-lidhje ishte drejtuesi i Agjencisë së Statistikave të Kosovës, Avni Kastrati.

Ai bëri të ditur se regjistrimi edhe në këtë javë nuk ka qenë i ndarë në komuna por është bërë në të gjithë territorin e Kosovës.

Derisa, sa i përket pjesëmarrjes në regjistrim ai vlerëson se ishte e suksesshme.

“Në bazë të dhënave vlerësohet se përveç pjesës veriore që ka hezituar, pjesët e tjera vlerësohet të jetë një ndër regjistrimet më të suksesshme sa i përket gjithëpërfshirjes, Besojmë që do të jemi 99.8% në pjesëmarrje”, tha ai, përcjell Klankosova.tv

Tutje, Kastrati njoftoi se numri i popullsisë ka kaluar shifrën 1.5 milion.

“Të dhënat në fund të muajit gusht të dhënat t’i publikojmë, por do ta bëjmë të pamundurën që t’i publikojmë në korrik. Shifra prej 1.5 milion është kaluar”, bëri të ditur Kastrati.

Ndër të tjera, Kastrati theksoi se ata që nuk janë regjistruar do të përballen me sfida.

“Një person që nuk është në regjistruar do të ketë sfida, ministritë e tjera do të kërkojnë informacion nëse ai ose ajo ka qenë pjesë e popullsisë rezidente”, tha Kastrati në Info Magazinë.

---