Kosova mbështet sportin në diasporë

Ministri i Diasporës, Valon Murati u takua me futbollistët e “FC Kosova – Cyrih”, fitues të Kupës së Diasporës

Ministra kosovare e Diasporës iu premton mbështetje të parezervë të gjithë sportistëve shqiptarë që luajnë jashtë vendit, për t’i promovuar vlerat kombëtare. Kështu ka deklaruar ministri Valon Murati gjatë një takimi që zhvilloi me futbollistët e klubit “FC Kosova” nga Cyrihu i Zvicrës.

Këta të fundit janë shpallur fitues të Kupës së Diasporës, ndërsa në Kosovë kanë ardhur me qëllim të mbajtjes së një ndeshje reviale me fituesin e Kupës së Kosovës, “KF Feronikeli”.

Gjatë këtij takimi ku ishte i pranishëm edhe kryetari i Federatës së Futbollit të Kosovës, Fadil Vokrri, ministri Murati iu dha mbështetje klubit “FC Kosova”, për aktivitetet sportive në diasporë.

“Ministria e Diasporës ka në plan që ndeshje të këtilla vëllazërore t’i ndihmojë në organizim edhe në të ardhmen, duke përfshirë edhe klubet nga Shqipëria, klubet shqiptare nga Maqedonia në formë të super-kupës. Ministria që e udhëheq do të jetë gjithmonë në përkrahje të klubeve sportive nga diaspora”, tha ministri Murati.

Ndërsa kryetari i këtij klubi, Arsim Hyseni e falënderoi ministrinë për përkrahjen e vazhdueshme që ka dhënë si në të kaluarën, ashtu edhe për këtë ndeshje.

Ndeshja mes “FC Kosovës” dhe “KF Feronikeli” do të zhvillohet më  17.11.2015 (e martë), në orën 13:00, në stadiumin e KF Feronikelit  në Drenas, ndërkohë ka karakter promovues.