Kosova mposhtet nga Sllovenia

Ekipi kombëtar i vashave i Kosovës është mundur bindshëm 3:0 nga Kombëtarja e vashave e Sllovenisë, duke ngelur edhe më prapa në garë për t’u kualifikuar në Kampionatin Evropian të Vashave 2021.

Pamela Begic dhe Nina Predanic shënuan herët në pjesën e dytë, para se Ana Milovic ta vuloste fitoren e slloveneve 10 minuta para fundit të martën në stadiumin Fadil Vokrri në Prishtinë, raporton Gazeta Express.

Dardanet po vinin nga një humbje e thellë kundër Rusisë të shtunën në Gjermani dhe disfata e dytë radhazi kundër Sllovenisë, nënkupton një goditje tjetër për gjasat e Kosovës për t’u kualifikuar direkt, duke e ditur se ajo tani ngel plot 12 pikë prapa lideres së Grupi A, Rusisë.

Rusia, megjithatë, ka një ndeshje më shumë të zhvilluar se Kosova.

Kjo ishte disfata e tretë, prej të cilave dy nga Sllovenia, e Kosovës në pesë ndeshje deri tani në këtë fushatë kualifikuese për Euro 2021.

Por ekipi i Aferdita Fazlijës mund ende të shpresojë në kualifikim, përmes vendit të dytë, pasi ka vetëm tri më pak se Rusia dhe Sllovenia që e ndajnë atë me nga 9 pikë. Kjo e parë, megjithatë, i ka zhvilluar vetëm katër ndeshje deri tani.

Për ta arritur kualifikimin nga pozita e dytë, Kosova duhet megjithatë ta korrë njërin prej rezultateve më të mira nga të gjitha rivalet e tjera që përfundojnë në pozitën e dytë në grupet e tjera, pasi vetëm tri prej tyre kualifikohen direkt, ndërsa gjashtë të tjera përmes play-off’t.

Në ndeshjen e radhës, Kosova përballet me sfidën më të vështirë deri tani në kualifikime, pasi më 10 prill e pret në Prishtinë lideren, Holandën.

---