Kosova në fokus të producentëve ndërkombëtarë për xhirime filmike

Producentë të huaj eksplorojnë Kosovën si mundësi për projekte filmike

Kosova po pozicionohet gjithnjë e më shumë si një destinacion potencial për prodhime filmike ndërkombëtare. Ministri i Kulturës, Rinisë dhe Sportit, Hajrulla Çeku, së bashku me drejtoreshën e Qendrës Kinematografike të Kosovës (QKK), Blerta Zeqiri, kanë pritur në takim disa producentë ndërkombëtarë, të cilët po shqyrtojnë Ballkanin si rajon për realizimin e projekteve të tyre të ardhshme filmike, shkruan albinfo.ch.

Gjatë takimit, ministri Çeku i ka njoftuar producentët me politikat e Kosovës në fushën e kinematografisë, duke vënë theksin në Ligjin e ri të Kinematografisë, skemën e rabatit për prodhimet filmike, lehtësitë administrative për ekipet e huaja, si dhe potencialin natyror dhe njerëzor që vendi ofron për xhirime.

Sipas përfaqësuesve institucionalë, kuadri i ri ligjor synon ta bëjë Kosovën më konkurruese në tregun rajonal dhe ndërkombëtar të industrisë filmike, duke krijuar kushte të favorshme për tërheqjen e investimeve të huaja dhe rritjen e prodhimeve kinematografike në vend.

Vizita e producentëve ndërkombëtarë në Kosovë ka përfshirë gjithashtu takime rrjetëzimi me producentë dhe profesionistë vendorë, me qëllim krijimin e bashkëpunimeve konkrete dhe afatgjata. Këto takime synojnë shkëmbimin e përvojave, zhvillimin e projekteve të përbashkëta dhe përfshirjen e ekipeve kosovare në prodhime ndërkombëtare.

Institucionet kulturore vlerësojnë se interesimi i producentëve të huaj për Kosovën përfaqëson një hap të rëndësishëm drejt promovimit të vendit si destinacion filmik në rajon dhe më gjerë, duke kontribuar njëkohësisht në zhvillimin ekonomik, forcimin e industrisë kreative dhe rritjen e prezencës së Kosovës në skenën ndërkombëtare të kinematografisë./Albinfo.ch

---