Kosovarët nuk i preferojnë prodhimet vendore

Gjeneratat e vjetra besojnë se prodhimet vendore janë cilësore, ndërsa brezat e rinj dyshojnë në cilësinë e produkteve “Made in Kosova”. Të rinjtë preferojnë produktet e huaja

Konsumatorët kosovarë ua shikojnë me vëmendje origjinën e prodhimit secilit artikull që e blejnë, qoftë tekstil, industri, amvisëri apo produkte ushqimore. Dhe nëse e shohin se produkti është “Made in Kosova”, hezitojnë ta blejnë sepse dyshojnë në cilësinë e tyre.

Kjo çështje nga prodhuesit vendorë konsiderohet si paragjykim, veçanërisht për faktin se prodhimet me origjinë nga BE dhe Serbia kanë përparësi në konsum.

Gjeneratat e vjetra, besojnë se prodhimet vendore janë më cilësore, por brezat e rinj, paragjykojnë apo nuk dëshirojnë të besojnë në cilësinë e mallrave kosovare.

Shefqet Kadishani (62) është profesor veteran. Kur pyetet për cilësinë e produkteve   ushqimore, ai thotë se ushqimi në atë kohë ka qenë origjinal, ndërkaq këto të sotmet, i quan pa shije dhe pa kalori.

“Kur kam qenë më i ri dhe deri para luftës, ushqimi ka qenë origjinal, vendor, kalorik. Tash nuk ka shije asnjë produkt. Në atë kohë një kilometër larg ke nuhatur erën e furrës së bukës. Unë i përdori vetëm se nuk kam çka të bëj. Shpesh marr miell të misrit, por prapë nuk është si dikur”, shprehet Kadishani, citon REL.

Por, Festina, studente në Departamentin e Stomatologjisë në Universitetin e Prishtinës, preferon më tepër produktet e huaja.

“Lëngje dhe çokollata blej më tepër nga produktet e huaja. Ndoshta jam mësuar me atë shije, apo prodhuesit vendor nuk prodhojnë kësi lloji mallrash. Thjesht, jemi mësuar me shijen. Në familje, babai zakonisht blen prodhime vendore, ndërkaq mami i përzien”, tregon duke qeshur Festina.

 Në anën tjetër, Valdet Gjinovci, kryeshef ekzekutiv në Agjencinë e Ushqimit dhe Veterinarisë thotë se prodhimet vendore i plotësojnë gati të gjitha kriteret e Bashkimit Evropian sa i përket e cilësisë së  tyre. Sipas tij, mallrat që gjenden në treg, janë të sigurta për konsum.

 Sot në Kosovë kemi edhe disa marka të mira të veshmbathjes. Por, blerësit kosovarë janë më të prirë të blejnë ndonjë markë të huaj, pavarësisht cilësisë se saj.

 Në Suharekë, veprimtarinë e saj e zhvillon Fabrika për Prodhimin e Këpucëve, “Solid”. Përveç mbulimit të një pjesë të madhe të tregut kosovar, prodhimet e “Solid”-it, tashmë kanë depërtuar në tregun e Bashkimit Evropian, konkretisht në një kompani prestigjioze në Itali “GEOX”.

 Pronari i kompanisë, Shefqet Kuçi e fajëson autoritetet qeveritare për mosvetëdijesimin e popullatës për cilësinë e produkteve vendore. Sipas Kuçit, mallrat kosovare kanë janë kualitative dhe të ngjashme me ato të Bashkimit Evropian.

 “Askush nuk bën promovim të prodhimeve vendore. Në Kosovë është politikë e gabueshme, sepse Qeveria nuk bën marketing të mirë për prodhimet vendore”, thekson Kuçi. 

 Pavarësisht, paragjykimeve të konsumatorëve dhe problemeve, me të cilat përballen prodhuesit vendor, disa nga mallrat “Made in Kosova” tashmë kanë depërtuar në tregun evropian, por edhe në Shtetet e Bashkuara të Amerikës.