Kosovari “mjeshtëron” vulën për të vozitur makinën e paregjistruar

Ai ka vendosur t`ua “luajë lojën” autoriteteve duke mjeshtëruar një vulë që shërben për të dëshmuar se makina është e regjistruar

Një qytetar i “gjindshëm” kosovar me qëndrim në Lörrach të Gjermanisë ka provuar të vozisë automjetin e tij të paregjistruar. Pasi që regjistrimi i është dukur i shtrenjtë, ai në dhjetorin e vitit të kaluar e ka çlajmëruar veturën e tij në entin përkatës.

Por,  kosovari 48 vjeçar nuk ka dashur të heq dorë nga vozitja e asaj makine. Për ta bërë këtë të mundur ai ka vendosur t`ua “luajë lojën” autoriteteve përmes një triku. Duke qenë i shkathtë në punëdore, ka “mjeshtëruar” një vulë që shërben për të dëshmuar se makina është e regjistruar.  Vulën e vendos te tabelat e regjistrimit dhe kështu krijon përshypjen se makina është e regjistruar. Si të tillë ai edhe e ka shfrytëzuar atë për një kohë.

Por ndërkohë policia e ka zbuluar dhe kosovari duhet të përgjigjet jo vetëm për falsifikim dokumentesh por edhe për shmangien e sigurimit detyruar të makinës si dhe për shkelje të ligjit mbi tatimet.