Kosovari në Suedi që ndihmon sportistët me shikim të dobët

Një atlet kosovar që jeton në Suedi po synon t’u dalë në ndihmë sportistëve me shikim të dobësuar. Një eksperiencë e re e realitetit virtual në Suedi u lejon fansave të shohin sportin përmes syve të atletëve me shikim të dobësuar. 

Kjo ide po promovohet nga kosovari me vendbanim në Suedi, Fatmir Sheremeti.

Sheremeti u detyrua të tërhiqet nga karriera futbollistike dhe tani merret me sportin e goalballit, që është projektuar posaçërisht për atletët me shikim të dobësuar. 

Sheremeti ka lindur në Vushtrri, ishte futbollist premtues në rininë e tij, por në moshën 13-vjeçare iu shfaq glaukoma dhe brenda dy vjetëve kishte humbur rreth 80 për qind të shikimit.

Zbulimi i sportit goalball i dha atij një qëllim të ri në jetë dhe që atëherë me Suedinë ka fituar një kampionat botëror dhe dy medalje paraolimpike për vendin e tij.

Goalball është projektuar posaçërisht për t’u luajtur nga atletët me shikim të dobët. Atletët mësojnë të përdorin shqisat e tyre dhe ekuilibrin e tyre për të shënuar dhe mbrojtur. Sheremeti, i cili tani është 49 vjeç, po ndihmon autoritetet suedeze të reklamojnë simulatorin VR, që ata kanë zhvilluar me sponsorët Toyota, për të rritur ndërgjegjësimin mes njerëzve me aftësi të kufizuara dhe publikut. 

“Kur ata më shohin duke luajtur goalball, njerëzit pyesin nëse jam vërtet i verbër”, tha ai për Reuters. Simulatori i lejon fansave të përjetojnë vështirësinë e të luajturit me dëmtime të ndryshme vizuale, si albinizmi dhe glaukoma.  Projekti nuk synon vetëm rritjen e vetëdijes për sfidat me të cilat ballafaqohen atletët me shikim të dobët.