Kosovë: Arrestohen dy zyrtarë policorë

Hetuesit e Inspektoratit Policor të Kosovës, në koordinim me Prokurorinë Themelore në Pejë, kanë arrestuar dy zyrtarë policorë, një nënkolonel dhe një kapiten, të dyshuar për veprën penale “Keqpërdorim i pozitës apo autoritetit zyrtar”.

Ndaj tyre është caktuar masa e ndalimit prej 48 orësh me vendim të prokurorit të rastit, teksa bëhet e ditur se hetimet kanë nisur pas raportimeve në media më 28 maj 2025 për një incident në rrugën “Shpëtim Bojku” në Pejë, ku zyrtarët policorë ishin njoftuar për një aksident trafiku, transmeton albinfo.ch.

Sipas njoftimit, gjatë këtij rasti, një person që nuk ishte i përfshirë në aksident, por kishte penguar zyrtarët në kryerjen e detyrës, ishte shoqëruar në stacionin policor, teksa dyshohet se nënkoloneli dhe kapiteni kanë ndërhyrë në rast, duke mos e përcjellë atë për hetim sipas procedurave standarde dhe duke mos e njoftuar Prokurorinë. Përkundër pengesës ndaj zyrtarëve, personit të shoqëruar i ishte shqiptuar vetëm një tiketë për prishje të rendit dhe qetësisë publike.