Kosovë: AUV ndalon kontrabandën, 485 dele dhe 25 qingja kthehen në Shqipëri

@unsplash

Agjencia e Ushqimit dhe Veterinarisë në Kosovë ka njoftuar se, në bashkëpunim me autoritetet kompetente, ka vendosur kthimin në vendin e origjinës të 485 deleve dhe 25 qingjave, të cilat kishin hyrë në mënyrë të paautorizuar në territorin e Republikës së Kosovës.

Bëhet e ditur se më 16 nëntor 2025, Policia Kufitare, Dogana dhe Shërbimi Veterinar ndaluan në Prizren një grup kafshësh të kontrabanduara, të cilat nuk posedonin certifikata shëndetësore veterinare dhe paraqisnin rrezik për përhapjen e sëmundjeve ngjitëse.

Tutje raportohet se kthimi i kafshëve në Shqipëri u realizua në bashkëpunim të ngushtë me Policinë e Kosovës, Policinë Kufitare, Doganën dhe Prokurorinë e Shtetit, transmeton albinfo.ch.

AUV kujton se importi i kafshëve të gjalla lejohet vetëm përmes pikave kufitare të autorizuara, ku kryhen kontrollet e detyrueshme dokumentare, identifikuese dhe veterinare, për të shmangur çdo rrezik potencial për shëndetin e kafshëve, sigurinë ushqimore dhe shëndetin publik.