Kosovë: Nderohen me pulla postare alpinistet Uta Ibrahimi dhe Mrika Nikqi

Alpinistet kosovare Uta Ibrahimi dhe Mrika Nikqi janë nderuar me emetimin e një serie të veçantë pullash postare, në një ceremoni të mbajtur në Prishtinë, në prani të përfaqësuesve institucionalë dhe të vetë alpinisteve.

Ky emetim i veçantë i kushtohet alpinizmit kosovar dhe rolit të grave që, përmes guximit, përkushtimit dhe arritjeve të jashtëzakonshme, kanë promovuar Kosovën në arenën ndërkombëtare. Në këtë kuadër, u vlerësua lart kontributi i Ibrahimit dhe Nikqit përmes ngjitjeve në disa prej majave më të larta të botës.

Ministrja Artane Rizvanolli përgëzoi dy alpinistet për sukseset e tyre, duke theksuar rëndësinë e promovimit të figurave që përfaqësojnë denjësisht Kosovën në botë. Ndërkaq, ministri Hajrulla Çeku Jagxhiu vuri në pah rëndësinë e inkurajimit të aktiviteteve në natyrë dhe rolin frymëzues që këto figura kanë për të rinjtë.

Gjatë ceremonisë, Uta Ibrahimi dhe Mrika Nikqi ndanë përvojat e tyre nga ekspeditat malore, sfidat që kanë përballuar dhe mesazhet motivuese për të rinjtë që të ndjekin një mënyrë jetese aktive dhe të disiplinuar.

Pullat postare iu dorëzuan alpinisteve nga Kryeshefja Ekzekutive e Postës së Kosovës, Nora Rraci, e cila theksoi se përfshirja e tyre në filatelinë e Kosovës përbën një vlerësim institucional për arritjet e tyre dhe kontribuon në promovimin e vendit.