Kosova
Kosovë: Qytetarët ankohen për shtrenjtimin e mundshëm të rrymës
Rritja e mundshme e çmimit të energjisë elektrike ka ngjallur shqetësim në mesin e disa qytetarëve të Kosovës.
Sipas tyre, kjo nuk do të jetë e përballueshme.
“Nuk e di se si do ta paguaj… Nuk e di, nuk e di… Çka mund të kursej? Ne edhe ashtu po kursejmë, se çmimet janë katastrofë [të larta], na kanë qitur për toke”, thotë Zahir Sallahu, bartës i një familjeje 5-anëtarëshe.
I punësuar në një kompani të sektorit privat në Prishtinë, ai paguhet rreth 320 euro në muaj.
Kosova e ka mbyllur vitin 2022 me një normë mesatare inflacioni prej 11.6 për qind. Rritje kanë pësuar çmimet e pothuajse të gjitha produkteve ushqimore dhe shërbimeve.
Rryma është shtrenjtuar po ashtu, por vetëm për ata konsumatorë që shpenzojnë mbi 800 kilovatë në orë, brenda një muaji. Ata paguajnë 12.5 centë për kilovat gjatë tarifave të shtrenjta, ndërsa 5.9 centë gjatë tarifave të ulëta. Konsumatorët që shpenzojnë më pak, paguajnë 7 centë për kilovat gjatë tarifave të shtrenjta dhe 3 centë gjatë tarifave të lira.
Zyrtarë të ZRRE-së thanë shkurtimisht se janë në “fazën e vlerësimit” të kërkesës dhe se nuk mund të deklarohen për tarifat përfundimtare.
KEDS-i e ka justifikuar kërkesën për rritje të tarifave të energjisë elektrike me rritjen e çmimit të rrymës së importuar, si dhe me pamundësinë e Korporatës Energjetike të Kosovës (KEK) për të prodhuar rrymë të nevojshme, sidomos gjatë sezonit të dimrit.
“Mosreflektimi i duhur rrezikon pozitën financiare të KEDS-it, e njëherësh rrezikon edhe sigurinë e furnizimit me energji elektrike në vend”, thuhet në kërkesën e parashtruar.
Kosova ka kapacitet të prodhojë rreth 800 megavatë rrymë në orë, ndërsa nevojat e saj, në ditë dimri, arrijnë deri në 1.300 megavatë në orë. Këtë diferencë, ajo e importon nga jashtë.
Çmimi i rrymës në bursën hungareze HUPX, nga ku importon Kosova, ka shkuar duke u rritur. Nga 150 euro për megavat, sa ka qenë në muajin gusht të vitit 2021, ai ka arritur në rreth 430 euro për megavat në gusht të vitit të kaluar, për t’u stabilizuar më vonë në rreth 260 euro.
“Çmimi të ulet, jo të rritet”
Shkurte Morina, banore në Prishtinë, thotë se çmimi i rrymës që shpenzon familja e saj gjatë sezonit të dimrit, kur shfrytëzohet edhe ngrohja, arrin deri në 150 euro në muaj.
“Kjo është goditje jo vetëm për mua, por për të gjithë qytetarët. Duhet të jesh shumë, shumë ekonomist për t’ia dalë”, thotë Morina.
Bashkim Berisha tregon se në muajin janar ka paguar rreth 100 euro rrymë.
“Të katër anëtarët e familjes punojmë dhe në fund të muajit zero… Çka të them për qytetarët tjerë? Të gjitha çmimet e produkteve ushqimore janë shtrenjtuar, për shkak të inflacionit. Këta po thonë se inflacioni është 12 për qind, por çmimet janë rritur më shumë se 100%. E tash të rritet edhe çmimi i rrymës… Po shpresoj që ZRRE-ja nuk e merr një vendim të tillë”, thotë Berisha.
Nga muaji shtator i vitit të kaluar, Qeveria e Kosovës i ka subvencionuar të gjithë qytetarët që shpenzojnë më pak energji elektrike në muaj, krahasuar me muajin e njëjtë të vitit paraprak.
Secili konsumator që kursen së paku 5% të faturës, përfiton subvencion sa dyfishi i përqindjes së kursyer.
Ministri i Financave, Punës dhe Transfereve i Kosovës, Hekuran Murati, ka thënë se nga këto subvencione, kanë përfituar mbi 200 mijë familje.
Autoritetet e Kosovës, qysh në muajt e verës, u kanë bërë thirrje qytetarëve që ta kursejnë rrymën, për shkak të krizës globale energjetike, të cilën e ka thelluar lufta e Rusisë në Ukrainë.
Ato nuk kanë ofruar asnjë garanci se do të ketë furnizim të rregullt me rrymë gjatë dimrit, kur nevoja për ngrohje rritet.
Tarifat aktuale të energjisë elektrike do të jenë të vlefshme deri më 31 mars. ZRRE-ja bën shqyrtimin dhe caktimin e tarifave çdo vit.
Në gjysmën e dytë të vitit të kaluar, ministrja e Ekonomisë e Kosovës, Artane Rizvanolli, ka publikuar Draft-Strategjinë e Energjisë për vitet 2022-2031, e cila parasheh rritjen e kapaciteteve për prodhim të energjisë së ripërtërishme në Kosovë.
Sipas Rizvanollit, synim është që pas dhjetë vjetësh, 35 për qind e energjisë elektrike të gjenerohet nga burimet e ripërtërishme. Kjo, sipas autoriteteve, do të ofrojë edhe siguri në furnizim, edhe stabilizim në çmime. /REL
E-Diaspora
-
Pesë Asamblistë të Cyrihut kërkojnë nga komuna t`i dhurojë Prishtinës kamionë për mbledhje e mbeturinave Asamblistët në fjalë janë: Flurin Capaul (FDP), Pascal Lamprecht (SP), Përparim Avdili (FDP), Reis Luzhnica (SP)...
-
Blick: Shaqiri dëshmon sërish pse Zvicra nuk mundet pa të
-
BQK: Dërgesat e mërgatës deri në fund të muajit shkurt 2024 arritën në mbi 174 milionë euro
-
52-vjeçari nga Kosova gjen vdekjen në vendin e tij në punës në Itali
-
Shkolla shqipe në SHBA, me qindra nxënës shqiptarë
Jeta në Zvicër
-
Iniciativat zvicerane synojnë t’i japin fund diskriminimit të çifteve të martuara Partia qendrore e Zvicrës ka dorëzuar nënshkrimet për dy nisma që synojnë "arritjen e drejtësisë për...
-
Ortekët kanë mbytur 14 persona në Zvicër këtë dimër
-
Drejtori i Përgjithshëm i UBS-së, Sergio Ermotti, fitoi 14.4 milionë franga vitin e kaluar
-
Zvicër: Delegacioni i financave kritikon krijimin e sekretariateve të reja shtetërore
-
Cyrihu kërkon të ndryshojë tarifat për procesin e nënshtetësisë zvicerane