KQZ miraton fletëvotimin për votuesit jashtë Kosovës për zgjedhjet e 28 dhjetorit

Komisioni Qendror i Zgjedhjeve (KQZ) ka miratuar dizajnin dhe përmbajtjen e fletëvotimit për votimin jashtë Kosovës për zgjedhjet parlamentare të 28 dhjetorit 2025, transmeton albinfo.ch.

Gjatë mbledhjes së fundit të KQZ-së u bë e ditur se do të hartohet një fletëvotim i veçantë për vendvotimet brenda vendit, pasi të sqarohet qartë se cilat gjuhë duhet të përfshihen.

Fletëvotimi për diasporën përfshin të gjitha subjektet politike pjesëmarrëse, të renditura sipas shortit të mbajtur nga KQZ-ja. Në total janë 24 subjekte zgjedhore: 18 parti politike, 3 koalicione, 2 iniciativa qytetare dhe 1 kandidat i pavarur.

Ky hap synon të sigurojë që votuesit jashtë Kosovës të kenë një proces të qartë dhe të drejtë për të zgjedhur përfaqësuesit e tyre në Kuvend.