KQZ: Votuesit me postë nuk mund të votojnë edhe në Kosovë

KQZ: Votuesit me postë largohen nga listat, s’mund të votojnë edhe në Kosovë

Komisioni Qendror i Zgjedhjeve ka bërë të ditur se të gjithë shtetasit e Kosovës që regjistrohen për të votuar me postë nga jashtë vendit, do të largohen nga listat e votuesve brenda Kosovës. Emri i tyre do të figurojë vetëm në listën e votuesve jashtë vendit, përcjell albinfo.ch.

Zëdhënësi i KQZ-së, Valmir Elezi, tha se kjo është një kërkesë ligjore dhe votuesit informohen individualisht për këtë procedurë. Ai sqaroi se ata që duan të rikthehen në listat e votuesve brenda Kosovës, mund të paraqesin kërkesë deri 24 orë para mbylljes së afatit për kundërshtimin e listave.

Regjistrimi i votuesve jashtë Kosovës për zgjedhjet lokale të 12 tetorit ka nisur më 23 korrik dhe do të zgjasë deri më 29 gusht 2025. Votimi me postë do të zhvillohet nga 17 shtatori deri më 11 tetor. Në këto zgjedhje qytetarët jashtë vendit nuk do të kenë mundësi të votojnë nëpër përfaqësitë diplomatike, por vetëm përmes postës.

---