Kriza politike largon investitorët e huaj

Ekspertët e ekonomisë në Prishtinë vlerësojnë se ngërçi politik do të ketë impakt më së shumti te tërheqja e investitorëve të huaj

Kriza politike që ka papërfshirë Kosovën në gjashtë muajt e fundit, ka ndikuar negativisht edhe në zhvillimin ekonomik, por edhe në aspektin diplomatik të vendit. Ekspertët e ekonomisë në Prishtinë vlerësojnë se ngërçi politik do të ketë impakt më së shumti te tërheqja e investitorëve të huaj.

Sipas tyre, asnjë reformë fiskale, apo ligj i cili ndihmon në përmirësimin e komunikimit me investitorë strategjikë, nuk mund të gjenerojë rezultate konkrete, nëse investitorët nuk binden për sigurinë politike që ofron Kosova i shtet.

Arian Zeka, është kryetar i Odës Ekonomike Amerikane në Kosovë. Ai thotë se faktorët politikë janë faktorë të rëndësishëm në mjedisin e të bërit biznes dhe janë ndër faktorët kyçë të cilët merren në konsideratë nga ana e investitorëve të huaj, raporton gazeta Zëri.

Sipas tij, kriza politike e vitit 2015, por edhe ajo e vitit 2914, kanë ndikuar negativisht në tërheqjen e investimeve të huaja direkte, por edhe në nxitjen e investimeve të brendshme. “Investitorët do të pezullojnë planet e tyre për investime për momente më të favorshme, ose edhe zgjedhin destinacione të tjera ku do të realizonin planet e tyre për investime”, ka thënë ai.

Ndryshe, Kosova në dy vitet e fundit, është duke u përballur me krizën e dytë politike.

Në vitin 2014, shteti më i ri i Evropës, përjetoi një ngërç, pasi partitë politike për gjashtë muaj rresht, nuk arritën të merren vesh për formimin e qeverisë së re. Ndërsa aktualisht ka gjashtë muaj, që Kuvendi i Kosovës po mbahet i bllokuar nga opozita, për shkak të dy marrëveshjeve, që qeveritarët kosovarë nënshkruan në Bruksel e Vjenë, me Serbinë dhe me Malin e Zi.