Kroacia heq vizat e veta, për ata që kanë Schengen

Nga ky vendim, përfitojnë edhe kosovarët që tash janë më të izoluarit në Ballkan

Për vitin 2012, kalimi nëpër territorin e Kroacisë, i të gjithë atyre që kanë ndonjë vizë valide Schengen, do të jetë edhe më i lehtë.

Albinfo.ch ka siguruar një dokument zyrtar të shpërndarë nga Ministria e Punëve të Jashtme dhe Integrimeve Evropiane të Kroacisë

Për më tepër, tashmë kosovarët, do të mund të shkojnë drejt shteteve të Evropës perëndimore edhe nëpër rrugët tokësore.

Kjo për faktin se Kroacia ka marrë vendim që të gjithë ata që kanë një vizë valide Schengen, nuk do të kenë nevojë të pajisen me vizë të veçantë kroate.

Madje, ata që kanë një vizë Schengen, mund edhe të qëndrojnë për një periudhë të caktuar në territorin e shtetit Kroat, apo thjesht të kalojnë transit.

Ky vendim i Qeverisë kroate, pritet të ndikojë pozitivisht edhe te kosovarët  të cilët për shkak se janë të vetmit në rajon që nuk kanë liberalizim të vizave, biletat e avionit i paguajnë me çmime shumë të larta. 

Përveç kësaj, ky vendim pritet të ndikojë pozitivisht edhe te diaspora e madhe shqiptare në Evropë të cilët zakonisht për festa dhe pushime, vijnë në shtetet e tyre të origjinës në Ballkan.

Kështu, Kroacia ka vendosur të heq vizat për të gjithë ata që në pasaportën e tyre kanë vizë valide të zonës Schengen, duke filluar nga 1 janari 2012.

Në këtë dokument, që u është shpërndarë të gjitha ambasadave të këtij shteti në botë si dhe Ministrive të Punëve të Jashtme të shteteve të ndryshme, jepen edhe shpjegimet përkatëse.

Një urdhëresë e tillë e nënshkruar të martën me 13 dhjetor në Zagreb, ka mbërritur edhe në Ministrinë e Punëve të Jashtme të Kosovës në Prishtinë.

Së paku tash për tash, ky udhëzim  i ri i shtetit të Kroacisë, do të fillojë të aplikohet nga 1 Janari  deri me 31 dhjetor të vitit 2012.

Aty shkruan se vendimi është marrë në mbledhjen e Qeverisë së Kroacisë me  7 dhjetor dhe ka për  qëllim që të lehtësohet përkohësisht hyrja, qëndrimi dhe kalimi nëpër territorin e shtetit kroat.

Nga lehtësirat e kalimit nëpër Kroaci, qëndrimit, do të përfitojnë të gjithë ata persona të cilët kanë këto tri lloje vizash:

1-Leje qëndrimi Schengen, 2-Viza të përgjithshme Schengen (me dy apo më shumë hyrje) dhe 3-Viza të gjata qëndrimi (Viza D).

“Vizat Schengen duhet të jenë valide (me afat) në momentin kur dikush largohet nga shteti i Kroacisë”, thuhet në këtë vendim.

---