Kryeministri fyen gazetarin: “qen bir qeni”

“Alo, Isa Mustafa jam. Ti a nuk pate me çka me u marrë a veç me vellain tem a?...qen bir qeni. Ki me pagu shtrenjtë këtë”, ka thënë Mustafa në telefon

Kryeministri i Kosovë, Isa Mustafa edhe njëherë ka humbur durimin, por kësaj here jo ndaj rivalëve politikë siç ndodhë shpesh, por ndaj gazetarëve. Ai ka kërcënuar gazetarin Vehbi Kajtazi “se do ta paguaj shtrenjtë” publikimin e hulumtimit “Vëllai i kryeministrit Mustafa kërkoi azil në Francë dhe Gjermani” publikuar në Insajder

Mustafa i ka telefonuar gazetarit Kajtazi në ora 17 e 32 nëpërmjet Viberit, duke e sharë dhe keërcpnuar.

“Alo, Isa Mustafa jam”, është prezantuar kryeministri. Ti a nuk pate me çka me u marrë a veç me vellain  tem a?”, ka thënë Mustafa.

Gazetari i ka thënë se artikulli është publikuar për shkak se bëhet fjalë për migrimin e vëllait të kryeministrit dhe tregon për gjendjen e keqe në sektorin e shëndetësisë, citon Insajder gazetarin.

“Vëllau jem nuk osht në dorën teme, por në dorën e sëmundjes. Ka kancer në fyt more qen bir qeni. Ki me pagu shtrenjtë këtë”, ka thënë Mustafa duke e mbyllur telefonin.

Gazetari  ka komunikuar me zëdhënësin Arban Abrashi për t’i kërkuar sqarime rreth këtij rasti. Abrashi ka thënë se ndodhet jashtë vendit. Ai ka shprehur keqardhje dhe ka shtuar se kryeministri nuk po i a hap telefonin.

I menjëhershëm ka qenë reagimi i Asociacionit të Gazetarëve të Kosovës, i cili është  tronditur me lajmin se kryeministri Isa Mustafa ka kërcënuar gazetarin Kajtazi, pas publikimit të hulumtimit “Vëllai i kryeministrit Mustafa kërkoi azil në Francë dhe Gjermani”.

“Gazetari Kajtazi ka bërë të ditur se posedon prova se telefonata kërcënuese ka ardhur nga numri i telefonit të kryeministrit Mustafa. AGK konsideron se ky rast është skandaloz, sidomos kur kërcënimi vjen nga një autoritet i lartë, i cili do të duhej të jetë garant i lirisë së shprehjes dhe ushtrimit të lirë të profesionit të gazetarisë”, thuhet në reagim.

Asociacioni i Gazetarëve të Kosovës kërkon nga kryeministri Isa Mustafa që të kërkojë falje publike dhe ta sqarojë pozicionin e tij lidhur me këtë çështje serioze.

Kjo situatë, sipas AGK-së, shpërfaq gjendjen e rëndë dhe kushtet e pafavorshme për ushtrimin e lirë të profesionit të gazetarisë në Kosovë.

“Ndërkaq, kërcënimet dhe dhuna ndaj gazetarëve në rritje kërkon vëmendje të posaçme nga organet e rendit për gazetarët. Të vetëdijshëm se liria e shprehjes dhe e medies është një prej vlerave më të rëndësishme të një shoqërie demokratike, AGK u bënë thirrje institucioneve të vendit që të kenë prioritet punën e gazetarëve dhe të marrin masa për krijimin e një ambienti të sigurt për gazetarët”, thuhet në reagim.

AGK thuhet se do ta njoftojë komunitetin e gazetarëve për veprimet dhe aktivitetet e mëtejme në raport me Kryeministrinë.

Ndryshe, reagimi i kryeministrit ka ardhur pasi ky medium ka publikuar një hulumtim, ku tregohet se bashkë me valën e refugjatëve, vitin e kaluar ka imigruar ilegalisht në Gjermani edhe vëllai i kryeministrit Mustafa, Ragipi. Kryeministri e pranon këtë, por thotë se ai ka shkuar për shkaqe shëndetësore, ndërsa tani është në Kosovë në gjendje të rëndë shëndetësore, duke luftuar me kancerin në qafë.