Kryeministri i thotë rrenc ish-bashkëluftëtarit të tij

"Ti po thua  që për pak ditë pushtet e kam shit tokën, ti je rrenc i madh, ti ke qëndruar në Shqipëri, je shëtit paraluftës, gjatë luftës dhe pasluftës, gjithë kohës, e dinë që nuk është ashtu, je ulë afër këtij burri (Albin Kurti) për vota, ky ka me pa që ke me lanë këtë shpejt”, i tha Haradinaj Selimit

Votimi i demarkacionit me Malin e Zi shkaktoi një përplasje në mes të deputetit të Vetëvendosjes, Rexhep Selimi dhe kryeministrit të Kosovës, Ramush Haradinaj.

Ka mjaftuar përmendja e këtij fakti nga Selimi duke nervozuar keq të parin e ekzekutivit.

Haradinaj e ka quajtur gënjeshtar Selimin, si dhe ia ka përmendur faktin se me gjithë aktivitetin e tij për liri dhe pas luftës në politikë asnjëherë nuk e ka gjetur asgjë, përcjell albinfo.ch.

Ky debat i ashpër mes Selimit dhe Haradinajt u bë gjatë debatit për shqyrtimin e Projektligjit për Ratifikimin e Marrëveshjes për Hua ndërmjet Kosovës dhe Bankës Evropiane për Rindërtim dhe Zhvillim, për Projektin e Autostradës Kijevë-Zahaq.

“Është evidente që pas miratimit të marrëveshjes së pardjeshme, rruga për në Mali të Zi është shkurtuar më shumë, madje është shkurtuar për disa kilometra. Dua ta konfirmoj edhe një herë që unë nuk iu kam gëzuar kësaj, nëse dikush iu ka gëzuar kësaj janë ata që atë ditë në këtë sallë, pas ratifikimit duartrokitën dhe u përqafen me njëri-tjetrin, kurse, sa i përket asaj që t’i nxjerrim rrugët, rrugët që na u janë marrë i nxjerrim, por rrugët që i kemi dhënë vet kurrë më nuk do të mund t’i nxjerrim”, tha Selimi, transmeton “Kosovapress”.

Pas kësaj deklarate reagoi kryeministri i Kosovës duke akuzuar rëndë Rexhep Selimin.

“Ka diçka shumë interesant që dua t’ua them, Rexha është shumë i mençur. Prej që ia ka nis lëvizjes për liri, është aktiv po therrë nuk i ka hy, njëmend nuk i ka hy therrë Rexhep Selimit, ka shpëtuar vet, edhe pas luftës ka shpëtuar mirë, nuk e ka bërë asnjë ditë burg, asnjë problem nuk i ka ndodhë… por prit veç pak, ti po thua  që për pak ditë pushtet e kam shit tokën, ti je rrenc i madh, ti ke qëndruar në Shqipëri, je shëtit paraluftës, gjatë luftës dhe pasluftës, gjithë kohës, e dinë që nuk është ashtu, je ulë afër këtij burri (Albin Kurti) për vota, ky ka me pa që ke me lanë këtë shpejt”, i tha Haradinaj Selimit.

Video: Kosovapress