Kryeministrit Rama i bllokohet rruga edhe në Elbasan

Thotë se është i vendosur që zgjedhjet nuk do të shtyhen. Kryeministri i Shqipërisë një ditë pasi u përball me bllokim të rrugës në qytetin e Shkodrës, njëjtë i ka ndodhur edhe në qytetin e Elbasanit.

Në këtë qytet ka pasur përplasje mes policisë dhe mbështetësve të opozitës, të cilët kishin bllokuar rrugën, përcjell albinfo.ch.

Ish-deputeti i PD-së në Elbasan, Aurel Bylykbashi, tha se qytetarët kanë dalë në protestë “për t’i thënë stop varfërisë dhe krimit”.

Pavarësisht bllokadës, kryeministri ia arriti të futej në qytet. Nga Elbasani, ai akuzoi opozitën se ka braktisur besën e elektoratit që i zgjodhi.

Kryeministri Edi Rama u shpreh i vendosur se zgjedhjet më 30 qershor do të mbahen dhe se PS do të marrë të gjitha bashkitë në vend, edhe nëse në këto zgjedhje nuk merr pjesë opozita.