Lajme

Të shtunën, protestë në Cyrih, në mbrojtje të Republikës së Kosovës

Në mesin e bartësve të fjalimeve në këtë tubim do të jetë edhe Fabian Molina nga Komisioni për politikë të jashtme në Dhomën e Kantoneve të Parlamentit të Zvicrës

E premte, 23 Qershor 2023 - 20:40 albinfo.ch

Mërgata shqiptare, në dritën e zhvillimeve aktuale në dëm të Kosovës, ka zhvilluar iniciativa të ndryshme proteste në disa qendra të Evropës perëndimore. Kështu, pas tubimit protestues të mbajtur javën e kaluar në Vjenë, nesër, dy tubime të ngjashme do të mbahen, në Cyrih, Zvicër dhe Mynih, Gjermani.

“Më datën 24 qershor 2023, nga ora 14.00 në Sheshin Europaplatz Zürich, t‘i përgjigjemi kësaj proteste mbarëkombëtare e apartiake! Ftojmë të gjithë shqiptarët, të cilët janë aktivë në politikën helvetike si SP, SVP, FDP etj… t‘i bashkohen kësaj proteste”. Kështu, veç tjerash, thuhet në ftesën që një grup veprimtarësh shqiptarë nga Zvicra kanë publikuar në mediat sociale. Në grupin iniciativ bëjnë pjesë: Lulzim Kadriu, Nderim Ibrahimi, Emrullah Sallahu, Blerim Sadrija, Emir Ahmetaj, Argjend Shehu dhe Gzim Ramizi.

“Duke i thënë Stop Serbisë, i themi Stop Rusisë! Duke përkrahur republikën tonë, mbrojmë sovranitetin e Republikës sonë të larë me gjak… Boll mo!”, thuhet veç tjerash në thirrje.

Në mesin e bartësve të fjalimeve në këtë tubim protestues do të jetë edhe politikani i njohur zviceran, Fabian Molina, nga Komisioni për politikë të jashtme në Ständerat (Dhoma e Kantoneve, e Parlamentit të Zvicrës.

Protesta mbahet në sheshin Europaplatz, Zürich, ngjitur me stacionin kryesor hekurudhor (Haupthahnhof), me fillim në orën 14.00