Kryeprifti reformator kundër burkës dhe mbulesave tjera të fytyrës

Locher flet për një “ndalim të mbulimit” e jo “ndalim të burkas”, ndonëse edhe ajo do të përfshihej aty. Kreu i protestantëve ka theksuar se në Kuran nuk shkruan asgjë për mbulimin e fytyrës dhe nga ana tjetër, klerikët e lartë islamikë thonë se burka nuk ka të bëjë asgjë me islamin

Njeriu numër një i Kishës së Reformuar (protestante) të Zvicrës, Gottfried Locher është shprehur për një ndalim të përgjithshëm të mbulimit të fytyrës. Në një intervistë dhënë gazetave “Tages Anzeiger” dhe “Der Bund”, Locher, kryetar i Bashkësisë së Kishave Evangjeliste (Ungjillore) të Zvicrës ka thënë se kushdo që mbulon fytyrën, nuk është i aftë për të hyrë në raporte me të tjerët dhe me publikun, transmeton albinfo.ch..

Por, Locher flet për një “ndalim të mbulimit” e jo “ndalim të burkas”. Mirëpo, një ndalesë e tillë do ta përfshinte edhe burkën, ka thënë ai në intervistë. Më tutje Locher ka theksuar se në Kuran nuk shkruan asgjë për mbulimin e fytyrës dhe nga ana tjetër, klerikët e lartë islamikë thonë se burka nuk ka të bëjë asgjë me islamin.

Prandaj, sipas kreut të protestantëve zviceranë, bartja e burkas është “më shumë ideologji se sa teologji”, transmeton albinfo.ch

Ndonëse ai është kundër rregullave për veshjen, Locher thotë se “ne vendosim kufij nga të dyja anët. Nisur nga ndjeshmëria për zakonet, njerëzit nuk dalin lakuriq rrugëve. Nga ana tjetër, ne duhet të konstatojmë se cilido që lëviz në mënyrë publike, e ka një identitet. Dhe në këtë identitet bën pjesë edhe të treguarit e fytyrës.