Kryetari i Komunës e heq borën nëpër qytet

Rufki Suma, kryetari i Hanit të Elezit vendosi që vetë t’i pastrojë rrugët, me një xhip të komunës, të cilin e kishte transformuar në ekskavatorë për heqjen e bores

Kryetari i Hanit të Elezit, Rufki Suma ka vendosur të mos shpenzojë para nga buxheti komunal për pastrimin e rrugëve të kësaj qyteze. Ai vendosi që vetë t’i pastrojë rrugët, me një xhip të komunës, të cilin e kishte transformuar në ekskavatorë për heqjen e  bores.

Suma, një ish gueril i UÇK-së, ka arritur t’i fitoj zgjedhjet në Han të Elezit, ndërsa njihet si kryetari më me pak shpenzime.

Ndryshe nga komunat tjera të cilat shpenzojnë qindra mijëra euro për pastrimin e rrugëve nga bora, komuna e Hanit të Elezit po vepron ndryshe.

“Realisht e kemi ble përparësen e borës dhe e kemi vendosur në veturën e komunës. Sa i japim para kompanive të ndryshme, atë punë do ta kryejnë punëtorët e komunës si dhe unë personalisht”, citon “Zëri” Rufki Sumën, i cili heqësin e borës e kishte vendosur në xhipin Toyota.

Ai më tej ka treguar se edhe në fshatrat e Hanit të Elezit kanë bërë marrëveshje për pastrimin e rrugëve. “Po, kemi bërë marrëveshje me kryetarët e fshatrave që me traktorë të angazhohen të bëjnë punën. Ne i kompozojmë naftën (20 litra)”, ka thënë ai.