KSHZ vendosi: Struga në rivotim

Në Strugë do të ketë rivotime për raundin e dytë zgjedhor, pasi ankesave që bëri VMRO-DPMNE. Në balotazh fitoi bindshëm Ziadin Sela i PDSH-së

Komisioni Shtetëror i Zgjedhjeve (KSHZ) në Maqedoni ka pranuar katër ankesa të VMRO-DPMNE-së dhe ka vendosur që në komunën e Strugës të ketë rivotim, për zgjedhjet e balotazhit.

Zgjedhjet, siç informon INA, do të përsëriten në vendvotimin e Ladorishtës dhe në një vendvotim në Strugë. KSHZ, ndërkaq pritet t’i shqyrtojë edhe 13 ankesa të tjera për Strugën, të dorëzuara nga VMRO-DPMNE dhe LSDM.

Në Ladorishtë siç thuhet, zëvendëskryeministri për çështje ekonomike, Vladimir Peshevski si përfaqësues i VMRO-DPMNE-së është penguar për të ndjekur procesin e votimit.

KSHZ do të shqyrtojë edhe 252 ankesat e LSDM për parregullsi në 15 komuna. KSHZ po shqyrton ankesat edhe pas afatit të kaluar prej 48 orëve.

Shqyrtimit të ankesave për Strugën i ka paraprirë një debat i ashpër midis anëtarëve të KSHZ, sidomos mes dy anëtarëve shqiptarë, Subhi Jakupit të BDI-së dhe Bedredin Ibrahimit të PDSH-së. Në komunën e Strugës në raundin e dytë fitoi bindshëm kandidati shqiptar Ziadin Sela.