Kthehet nga Franca për të punuar në Shqipëri

Mjekët jo vetëm po e braktisin Shqipërinë, shumë prej tyre kthehen nga vendet perëndimore për të punuar në Shqipëri

Janë të shumtë mjekët dhe mjeket që po rikthehen për të dhënë kontributin e tyre në sistemin shëndetësor shqiptar, jo vetëm pas përfundimit të specializimeve, por edhe eksperiencës së përfituar në vende të ndryshme.

Një prej tyre është edhe Dr. Valmira, kirurge e përgjithshme e cila pas studimeve të kryera në “La Sapienza”, punon në qendrën spitalore të Pontoise, në Francë, transmeton “ATSH”.

Ministrja e Shëndetësisë dhe Mbrojtjes Sociale e Shqipërisë, Ogerta Manasterliu bën të ditur se Dr. Valmira po përgatitet të kthehet së afërmi për të punuar në sistemin shqiptar shëndetësor me dëshirën e madhe për të kontribuar për vendin, përcjell albinfo.ch.

Ministria e Shëndetësisë e Shqipërisë përmes një strategjie të veçantë për rikthimin e mjekëve në vendin e tyre pas specializimeve jashtë Shqipërisë, ka stimuluar me një sërë bonuse për bluzat e bardha, në mënyrë që këta të fundit të motivohen përmes një pagese të denjë, si dhe të ndajnë eksperiencën e marrë në spitalet më të mira botërore.

Mbështetja ndaj mjekëve parashikohet edhe në projekt buxhetin e 2019 për shëndetësisë.

---