Kultura, boshti i pathyer i diasporës

Në Kapfenberg të Austrisë për nder të Festave të Nëntorit u mbajt një orë letrare, e organizuar nga shoqata” Internationale”, ku u prezentuan poetë dhe poete nga Republika e Steiermarku-ut, me punimet e tyre.

Në një sallë të bukur e të përgatitur enkas për këtë organizim, fjalën e hapjes në emër të shoqatës “Internationale” e mbajti Naim Sadiku, kryetar nderi, njëri ndër themeluesit dhe aktivisti shumëvjeçar në disa shoqata. Ai u shprehu mirëseardhje të pranishmëve dhe njoftoi për aktivitet e shoqatës dhe qëllimin e këtj organizimi, i pesti me radhë. Në këtë orë letrare për herë të parë u paraqit edhe poetja Kimete Zahiti Ternava me poezi nga libri i saj ”Kalëruese e dhembjeve jam”, botuar nga shtëpia botuese “Armagedoni” në vitin 2018 në Prishtinë, dhe përkthyer në gjermanisht në vitin 2019 “ Reiterin der Schmerzen bin Ich”.

Poetja lexoi disa poezi, ndër të tjera edhe ”Prisja ditën që s´erdhi kurrë”, “Të përshëndes, Kosovë”, të cilat zgjuan kërshërinë e publikut me shprehje tejet emocionuese të radhitura në vargje, të cilat hynë thellë në botën e vështirë të përjetimit te të pranishmit.

Me këto poezi, poetja nga qyteti Gleisdorf i Austrisë u tregua se është poete e cila gjithë dhembjen e mërgimit e shpreh në mënyrë mjeshtërore në vargje.

Gjithashtu me disa poezi u paraqit edhe poeti austriak Sepp Grassmugg, i cili në poezitë e veta e paraqet të tanishmen, jetën dhe gjërat, të cilat e preokupojnë, është poet i njohur, njëherësh edhe kryetar i “Europa Literatur Kreis Kapfenberg” me një rrjet të shtrirë aktivitetesh në disa shtete.

Në fund mund të themi se përkundër vështirësive, njerëz të kulturës në diasporë hapërojnë rrugën e tyre në mënyrë të sigurt drejt shtigjeve të sukseseve, kjo shihet edhe nga përkrahja e individëve dhe shoqatave të ndryshme.