Kur do ta shohim Rashicën në fushë?

Ylli i Werder Bremen, Milot Rashica, do të rikthehet në aksion pas dy javëve për ta rifilluar misionin e vështirë për ta shpëtuar klubin e vet nga rënia prej Bundesligës.

Edhe zyrtarisht sezoni 2019/20 në Bundesligë do të rifillojë më 16 maj dhe do të mbarojë më 27 qershor, konfirmoi sot Liga e Futbollit Gjerman, shkruan Gazeta Express.

Futbolli në Gjermani u pezullua në mes të muajit mars, si pasojë e shpërthimit të pandemisë koronavirus me të cilën janë infektuar mbi 150 mijë persona dhe kanë vdekur gati 6.300 persona deri tani. Por, meqë situata është përmirësuar shumë dhe numri i të infektuarve ka rënë dukshëm, qeveria gjermane dha dritën e gjelbër për rikthimin e futbollit në vend.

Sezoni, i ndërprerë pas javës së 25-të në mars, do të rifillojë aty ku mbeti, me ndeshjen mes Borussia Dortmundit dhe Schalkes të shtunën më 16 maj.

Por kur do ta shohim yllin e Kombëtares së Kosovës, Milot Rashicën, në aksion?

Werder Bremen do të jetë nikoqir i Bayer Leverkusen të hënën më 18 maj, me 23-vjeçarin nga Vushtrria që do të përpiqet ta vazhdojë formën e mirë që e gëzonte para pandemisë Covid-19.

Rashica, për të cilin është përfolur vazhdimisht gjatë këtij viti se do të largohet nga Werderi, kishte thënë gjatë karantinës se nuk e tundonin ofertat nga klubet e mëdha, sepse është i përqendruar t’i ndihmojë klubit të vet të mbijetojë në ligën elitare gjermane.

Klube si Liverpool, Chelsea dhe Borussia Dortmund, si dhe shumë të tjera në Evropë thuhet të kenë shfaqur interesim për 23-vjeçarin nga Vushtrria, i cili e ka një klauzolë lirimi në vlerë 38 milionë euro në kontratën e tij me Werderin.

Madje, sipas mediave gjermane, Dortmundi i ka nisur bisedimet me Werderin për Rashicën, të cilin e sheh si zëvendësues ideal të anësorit anglez Jadon Sanchon, i cili pritet të largohet këtë verë.

---