Kurti i përgjigjet kryeprokurorit: Është absurde mosngritja e aktakuzës ndaj Radoiçiqit

Albin Kurti, FB

Kryeministri i Kosovës, Albin Kurti, i është kundërpërgjigjur kryeprokurorit të Prokurorisë Speciale, Blerim Isufaj, i cili tha se Kurti nuk duhet të ndërhyjë në punët e prokurorisë.

“Nuk e di a e ndani edhe ju me mua habinë se si është e mundur që Milan Radoiçiq e pranon që e ka kryer krimin e nuk ka aktakuzë. Unë besoj se as nuk ka nevojë të kryhet Fakulteti Juridik e as nuk ka nevojë për Bachelor, Master apo PhD dhe as nuk ka nevojë të jesh as gjyqtar e prokuror, por vetëm arsyeja e shëndoshë normale e qytetarit të Kosovës e identifikon një absurditet të tillë. Informacionin që e ka sjellë AKI-ja, Policia e Kosovës dhe ju si gazetarë në Banjskë është enorm. Ndërkaq shumica e qytetarëve të Kosovës nuk ia dinë emrin prokurorit që merret me rastin e Banjskës në Zveçan”, ka thënë Kurti.

Më 24 shtator, një grup i uniformuar serbësh në një sulm të organizuar vrau policin Afrim Bunjaku. Në aksionin pasues të Policisë u vranë tre sulmues, ndërsa grupi iku. Në Serbi, Radoiçiqi ka pranuar përgjegjësinë, përcjell albinfo.ch.