Kurti: Kjo është hakmarrje e Serbisë

“Kërkojmë lirimin e menjëhershëm të tre zyrtarëve të rrëmbyer policorë dhe ftojmë faktorët ndërkombëtarë që të dënojnë këtë akt agresioni të Serbisë”, shprehet Albin Kurti

Kryeministri i Kosovë, Albin Kurti, thotë se tre policë të Kosovës janë kidnapuar nga ushtria e Serbisë. Kurti thotë se kjo është hakmarrje pas arrestimit të kriminelit Millun Millenkoviq – Lune nga policia e Kosovës.

“Tre zyrtarë të policisë së Kosovës janë rrëmbyer sot në Leposaviq, në vendin ku dikur kishte një rrugë ilegale të kontrabandës e që ndodhet rreth 300 metra në brendësi të territorit të shtetit tonë.

Dyshojmë që ata janë rrëmbyer nga ushtria e Serbisë, qartazi si hakmarrje e Serbisë për arrestimin e djeshëm të kriminelit famëkeq Millun Millenkoviq – Lune, i cili paraqet një ndër krerët e krimit të organizuar dhe kontrabandës”, shkruan Kurti në Facebook, duke vazhduar: “Policia e Kosovës është treguar tejet e vetëpërmbajtur këto javët e fundit. Hyrja e forcave të Serbisë në territorin e Kosovës është agresion dhe synim për eskalim dhe destabilizim. Kërkojmë lirimin e menjëhershëm të tre zyrtarëve të rrëmbyer policorë dhe ftojmë faktorët ndërkombëtarë që të dënojnë këtë akt agresioni të Serbisë”.

---