Kosova

Kurti: Kodi i humanizmit po shkelet e nëpërkëmbet nga pushtete e individë të fortë

Kryetari i VV-së, Albin Kurti, thotë se universialiteti është ajo që njerëzit e kanë të përbashkët

Sot, më 10 dhjetor, është Dita Ndërkombëtare e të Drejtave të Njeriut. Kjo datë është një përkujtim i Deklaratës Universale për të Drejtat e Njeriut, e cila u miratua më 10 dhjetor të vitit 1948 nga Asambleja e Përgjithshme e Kombeve të Bashkuara.

Kryetari i VV-së, Albin Kurti, thotë se universialiteti është ajo që njerëzit e kanë të përbashkët.

“71 vjeç është bërë njeriu sot. Sepse e ka ditëlindjen më 10 dhjetor. Sepse sot u mbushën 71 vjet nga miratimi i Deklaratës Universale për të Drejtat e Njeriut. Universialiteti është ajo që e kemi të përbashkët. E si njerëz e kemi njeriun, me të drejtat dhe liritë e tij, që nga viti 1948”, shkruan Kurti.

Sipas tij, “tragjedia njerëzore e shkaktuar nga brutaliteti i pashembullt i imperializmit të shpërfaqura në format më të egra të mohimit të qenies dhe të drejtave të njeriut, fashizmit dhe nacizmit, mblodhi të gjithë dijen, përkushtimin dhe ndjeshmërinë njerëzore për të garantuar qenien njeri dhe të drejtat themelore të tij”.

“Tragjedia e luftës dhe ato të përditshmet na thërrasin me gjithë fuqinë për angazhim të pandërprerë politik, individual e shoqëror kundër shkeljes dhe shkelësve të të drejtave të njeriut në çdo kohë, për çdo çast, pa ndërprerë. Përvoja historike mbi shtatëdhjetëvjeçare, ka dëshmuar dhe vazhdon të dëshmojë se ky kod i humanizmit politik, i pranuar botërisht, i përkthyer në të gjitha gjuhët e shkruara të njerëzimit, i botuar e publikuar në miliarda kopje, thyhet, shkilet e nëpërkëmbet nga pushtete e individë të fortë që kanë monopolizuar paranë, dhunën e pushtetin, në institucione shtetërore e parashtetërore dhe jashtë tyre, duke shkaktuar tragjedi njerëzore individuale e kolektive, për çdo ditë në gjithë rruzullin tokësor”, shkruan tutje Kurti.

Kurti thotë: “Të këqijat në formën e papunësisë, deprivimit ekonomik, përjashtimit shoqëror, mohimit të së drejtës në siguri shëndetësore e pensionale, ndotjes së ambientit, mungesës së ujit të pijshëm e ushqimit, dëbimit me dhunën e hekurit e zjarrit të qindra milionë njerëzve nga shtëpitë dhe atdheu i tyre dhe mohimit të shtetësisë e qenies njerëzore në mijëra kampe refugjatësh anembanë botës, janë përditshmëri trishtuese që ngjajnë për çdo ditë, minutë, sekondë, edhe në këtë çast”.

“Si njerëz e kemi obligim angazhimin për njeriun si qenie me të drejta dhe liri. Duke përmbushur këtë obligim bëhemi ajo që jemi: njerëz të lirë e të drejtë”, përfundon shkrimin në Facebook kryetari i VV-së, Albin Kurti.

Presidenti i Kosovës, Hashim Thaçi, bëri homazhe në kompleksin përkujtimor në Reçak, pak ditë pasi presidenti i Serbisë, Aleksandar Vuçiq, mohoi këtë masakër duke e quajtur trillim.