Kurti: Ne besojmë në pafajësinë e katër krerëve të UÇK-së

Kurti flet pas deklaratës skandaloze të Gecit për Thaçin

Kryeministri i Kosovës, Albin Kurti, është pyetur nga gazetarët lidhur me deklaratat e deputetit Fatos Geci, duke theksuar se ai beson në pafajësinë e krerëve të Ushtrisë Çlirimtare të Kosovës që po mbahen në Hagë.

Kurti ritheksoi qëndrimin e Vetëvendosjes ndaj Gjykatës Speciale, duke e cilësuar atë si “gjykatë jonormale”, ndërsa shtoi se janë të bindur në drejtësinë e luftës çlirimtare të popullit të Kosovës.

“Ne jemi të bindur për drejtësinë e luftës çlirimtare të popullit të Kosovës, dhe në pafajësinë e katër krerëve që po mbahen padrejtësisht në Hagë”, deklaroi Kurti.

Ai gjithashtu përmendi se kryetarja e Kuvendit i ka tërhequr vërejtjen deputetit dhe ia ka ndërprerë fjalën, për shkak të gjuhës dhe komenteve të bëra gjatë seancës.

Kurti tha se ai është kryetar i Vetëvendosjes dhe kryeministër i Kosovës, por nuk ka rol në ndonjë komision disiplinor për deputetët.

“Unë jam vetë kryetar i VV-së, dhe vetëm kryeministër i Kosovës. Nuk jam kryetar i naj komisioni disiplinor, aq më pak për dikënd që i përket tjetër kujt”, u shpreh Kurti./Albinfo.ch

---