Kurti: Zajednicën nuk do e lejojmë

Nga mbledhja e Këshillit të Përgjithshëm të Vetëvendosjes, kreu i kësaj partie, Albin Kurti ka kërkuar zgjedhje të parakohshme.

Ai ka thënë se Qeveria Haradinaj do të duhej ta humbiste legjitimitetin në Kuvend dhe sa më parë vendi të shkojë në zgjedhje, transmeton albinco.ch.  “Dëshirojnë ta sjellin Zajednicën në gusht, kur Kuvendi është në pushim dhe qytetarët janë të shpërqendruar nga politika sepse janë duke pritur të afërmit e tyre që vinë nga jashtë vendit, janë duke organizuar dasma ose kanë shkuar në plazh. Politikë e ulët e qeverive frikacake, këto janë qeveria e tanishme sikurse ato të mëparshme që sjellin vendim që shkatërrojnë sovranitetin e Kosovës në një kohë kur praktikisht e gjithë politika është e suspenduar”, ka thënë Kurti.

Ai ka theksuar se ata do vazhdojnë ta kundërshtojnë formimin e Asociacionit. “Zajednica është e papranueshme, ne duhet të bëjmë çmos që t’i dalim përpara kësaj situate e mos të lejojmë bosnjizimin e Kosovës”, ka thënë Kurti.

Kurti ka akuzuar në këtë mbledhje deputetët e larguar nga partia e tij, duke thënë se ata e kanë dëshiruar shkatërrimin e Vetëvendosjes.